Jaman Now

Babaturan nga-sms kieu: Jaman now mah kudu loba ngusap dada, Wa.

Méméh mahabu jeung ramé nyebutkeun dua kecap: jaman jeung now, di masyarakat urang ogé kungsi ramé ku babasaan campuran saperti, mari kita kemon, wilujeng morning, jrrd.

Disebut viral atawa ngetrén téa meureun. Jaman now boga harti mangsa ayeuna. Pihartieunna, jalma mémang keur museurkeun pikiranna ka mangsa kiwari atawa ka jaman now.

Kecap jeung kebeungharanna mémang kitu. Tina kecap serepan bisa ngawujud jadi kecap anyar, malah diasupkeun kana kamus. Kawas kecap jaman pan éta ogé tina Basa Arab asalna mah, Zamaan.

Conto séjénna kecap Belanda. Sawaréh jalma aya anu boga kamandang kecap Belanda téh diadopsi tina kecap Blonde (Bulé, Pirang, B. Indonesia). Aya ogé nu boga kamandang éta kecap dicokot tina kecap londo jeung blah nde hartina megatkeun tali duduluran. Pihak séjén mah nyebut asalna tina kecap Holanda, Welanda, ku urang Sunda diucapkeun jadi Walanda.

Babasaan samodél 'jaman now' mangrupa kalimah pop, atawa kekinian ngan saharitaeun, dina dua atawa tilu bulan ka hareup bakal kaluar deui babasaan anyar anu ngalandih babasaan saméméhna.

Jadi, dina jaman now mah urang teu kudu geruh ku ayana istilah-istilah anyar anu sifatna nge-pop. Kudu siap hirup di jaman now, kitu wé.

Kang Warsa