Ti isuk nepika wanci lingsir ngulon, si Kemed tara waka unggah tina risbang. Luhureun risbang bari seuseurian sorangan anteng online dina HP Android. Babakuna, éta HP téh sok dikeukeupan lamun manéhna saré. Nguniang hudang téh lamun di masjid jami geus kadéngé Mang Adun adzan lohor. Bari kukuliatan, terus ngecharge heula hp, tara waka mandi, manéhna langsung ka dapur néangan dahareun. Camuil-camuil sangu poé anu geus dua poé lilana téh didahar , najan jeung uyah ogé teu burung beak.
“ Sugema aing mah najan dahar jeung uyah wungkul ogé ari geus boga HP Android mah…!”
“ Sugema aing mah najan dahar jeung uyah wungkul ogé ari geus boga HP Android mah…!”
Saméméh mandi manéna ngaupdate heula status dina facebook: “ MAU MANDI DULU AH… SOALNYA NICH BADAN UDAH PENGEN DISIRAMIN PAKE AIR KAYAKNYA. WALAUPUN MANDI SIANGAN TAPI TETEP AKU ANGGAP MANDI PAGI AJAH DEH. HEUHEUY DEUDEUH!” Baru saja. Via Android. Kitu eta status unina.
Bérés mandi, tap kana hédsét, hédsét dipasang kana HP. Terus lagu Ona Sutra disetél. Jegur-jegur dina ceuli kadéngé lagu dangdut Ona Sutra anu judulna Terbayang-bayang. Si Kemed teu sadar, manéhna ngéngklak jogged.
“ Anjirrrrrr ieu lagu. Heup heup ah… halahhhhhh…….!” Bari angger jogged.
Geus bérés jogged, si Kemed kaluar ti imahna, muru ka Warung Mang Ujang. Hawa karasa tiis, angkeub kacida, sakeudeung deui ogé hujan turun. Mang Ukan jeung Kang Udin keur ngajaitan poé pare di lapang deukeut imah si Kemed. Kadéngé eta dua urang téh keur ngawangkong bari ngarasula da poé pare can garing-garing acan geus rék turun hujan. Si Kemed teu maliré ka éta dua jalma, manéhna anteng ngungkug leumpang muru Warung.
Di Warung Mang Ujang geus aya sababaraha urang, aya Kang Uki, Kang Sahrowi, jeung Hansip Ika. Jigana Hansip Ika mah keur ngadon reureuh, da sakuduna dina jam sakieu téh manéhna kuduna aya di Balédésa. Teu loba ngomong, tap si Kemed langsung nyokot Géhu, clom diabuskeun kana sambel suuk. Camuil-camuil manéhna ngadahar Géhu semu nikmat.
“ Pédo ieu géhu!” Pok si Kemed ka Mang Ujang. “ Ngan hanjakal, laleutik!!!”
“ Nyieun sorangan hayang Géhu badag mah. Tahuna meseun ka Pabrikna, tong kapalang meuseun anu sagedé tampir!” mang Ujang ngomong dibarengan ku camberut.
“ Lah, sakalian baé meseun tahu anu sagede imah kapalang…!” Témbal si Kemed. Rét manéhna ka Kang Uki anu anteng keur peureum beunta ngenyot roko Jarcok. “ Can aya kamajuan kénéh geuning silaing mah, Ki. Ti zaman abu Jahal dagang Suuk nepika zaman teknologi, roko téh angger wé Jarcok.” Si Kemed ngadelek, bari ngaluarkeun Roko Sampoerna Mild tina saku bajuna. “ Kadé éta puntungna tong dipiceun sangeunahna, bahaya… bisi aya anu kacugak ku Djarumna!”
“ Ah, gandéng siah, Kemed. Karak beunta saeutik ogé geus gedé hulu. “ Kang Uki nyantéy bari teuteup ngenyot Jarcok.
“ Geus nyaraho can arilaing?” Si Kemed diuk bari nanya ka anu aya di dinya.
“ Geus atuh!” Hansip Ika anu némbalan. “ Ceu Uum rék kawin deui jeung Bah Kowi !”
“ Aduhh…. Ieu hansip kuper! Kurang gaul, kurung batok, gawéna ulukutek di Balésésa jeung mesin ketik baé da!” Si Kemed ngomong rada adigung. “ Cing atuh sakali-kali mah buka internet, lain ngadéngékeun baé wayang golék dina radio transistor, Hansip!”
“ Sabodo ah, kumaha déwék wé. Teu muka internet ogé moal ngadadag miskin ieuh!” Hansip Ika embung éléh.
“ Heueuh, ngan silaing jadi kuper, katinggaleun informasi!” Tap si Kemed kana Bala-bala. “ Yeuh, lamun maranéh hayang nyaho, ayeuna téh keur ramé ngomongkeun PEMBANGUNAN GEDUNG DPR BARU, lain éta wungkul, aya deui kajadian gélo, anggota DPR waktu Sidang Paripurna deur ngadon ngalalajoan Film Porno!” Ceuk si Kemed bari ngaluarkeun HP Androidna.
“ Sabodo ah, lain masalah déwék! Rék gedung DPR anu heubeul dirugrugkeun ogé hég téh teuing ah. Rieut mikiran batur mah, mikiran keur dahar engké sore gé lieurrrr! Ditambah kudu mikiran batur, atuh mikin lieurrrr huluuuu!” Hansip Ika nepak tarang. “ Rék anggota DPR nanggap layar tanceub sabulan sugan, hég téh teuing. Atawa lamun bisa mah sina ngalalajoan film porno berjamaah kitu di gedung DPR , kapalang édan!”
“ Kieu da ari pikiran hansip kampung mah. Teu luas, mikirna karak nepi kana beuteung! Salaku rahayat , urang kudu paduli atuh kana hal-hal anu aya patula=patalina jeung urusan kanagaraan. Apan silaing ogé ulubiung lain dina pemilu taun kamari!? Malah silaing mah apan anu pang sebutna dina milu kampanye. Kampanye Golkar milu, kampanye PAN milu, Kampanye PDIP milu, Kampanye PKS milu. Kari-kari ayeuna api-api nalika para wakil urang rék ngawangun gedong DPR anyar. Salaku rahayat urang kudu milu bagéan atuh keur ngamajukeun ieu nagari. Komo manéh mah salaku hansip, abdi Negara! Beuh.. kumaha jadina ieu nagara lamun hansip sa Indonesia pikiranna sarua jeung manéh. Lamun geus boseun jadi hansip, léngsér atuh. Tuh si Lukman ogé siap ngaganti silaing!”
Hansip Ika camberut.
“ Makana manéh kudu ménta pangmeulikeun HP geura ka Kuwu Jumena supaya nalika tugas téh bisa internetan. Teu kudu meuli HP android siga anu déwék, hp=hp china ogé balatak di Konter!”
“ Ka Balédésa ah. Rieut ngawangkong jeung anu stress mah.” Hansip Ika jung nangtung, “ Iraha manéh rék lulumpatan bari sitaranjang deui, Kemed?” Hansip Ika semu ngaharéwos ngalédék ka si Kemed. Los manéhna ngaléos teu poho bari ngahéot siga Yudhistira tas ti médan laga.
Ditinggalkeun ku Hansip Ika, si Kemed malik deui ka Kang Uki.
“ Uki, kumaha tah ceuk piker manéh ngeunaan rék diwangunna Gedong DPR anu anyar?” Tanya si Kemed.
“ Tong nanya nu kitu ka déwék. Tanyakeun mah kumaha carana melak suuk, jagong, jeung kentang, kakara ku déwék dijawab!!” Kang Uki kalem bari ngadahar kurupuk udang.
“ Aéh éta si Surki. Kudu boga opini atuh. Pan urang téh salaku warga nagara. Wah… bener ieu mah nagara téh ancur lain kusabab anu dilaluhur wungkul, ogé diruksak ku rahayat anu teu paduli kana majuna ieu nagara!”
“ Ti baheula ogé asa can ngarasaan anu ngaranna maju déwék mah ,Kemed! Jadi keur déwék mah sarua baé lah. Nalika dijajah ku walanda ogé apanan bangsa urang mah tetep wé bisa dahar sanajan jeung bagal cau ogé. Malah bisa merdéka sagala pan?”
“ Asa jadi rieut ka aingna ieu mah ngabandungan urang Cihérang!!!” Belewek si Kemed ngadahar Géhu disamualkeun. “ Kopi sagelas. Tong loba teuing caina!!” Pénta si Kemed ka Mang Ujang.
“ Rék diuyahan moal?” Mang Ujang nanya.
“ Tong, sakalian wé saos jeung kécapan. Atawa lamun kurang kénéh racunan jeung sangkaliman, ngarah aing modar!”
“ Hahay… marah niyééé!” Ceuk Kang Uki bari melenyun ngudud Jarcok.
Suruput-suruput si Kemed nginum kopi siga anu haus. Pelenyun ngudud mani peureum beunta.
“ Tah baca ku manéh!!!!” Ceuk si Kemed ngadeukeutkeun hpna ka Kang Uki mani pas pisan kana irungna.
“ Tong dikana irung déwékkeun atuh, bisi dihampleu tah hp téh!” Kang Uki gegebes.
“ Ieu baca…. Baca ku manéh Uki. Moal enya make aya kondom urut sagala di gedong DPR!!! Lieurrr… lain antepkeuneun ieu mah. Bener ieu mah lain antepkeuneun, aing mayar pajak, duitna dipaké teu eucreug ku manusa anu ngakuna ngawakilan rahayat. Bener… aing kudu barontak ieu mah. Cicing baé sarua jeung mikeun beuheung teukteukeun. Baca… baca ku manéh Uki!”
“ Heueuh pan ieu ogé keur dibaca. Jempling atuh tong keukeuleuweuhan baé , déwék jadi rieut!”
###
Si Kemed teu genah cicing. Pikiranna pinuh ku kakeuheul ka para wakil rahayat anu aya di Jakarta. Bari anteng macaan berita dina HP android téh dibarengan ku kukulutus.
“ Aing kudu jadi betmen ieu mah!” Kitu pikirna. “ Ngan rék jadi betmen kumaha, silat ogé ngan bisa dua tilu jurus. Ah… kumaha engké baé lah. Nu penting aing kudu nyalametkeun ieu nagara méméh nagara ieu ancur!”
Poé éta kénéh ogé si Kemed ngajugjug ka kampung Babakan Kenyot. Rék nepungan Aki Uko. Hiji aki-aki anu boga élmu kanuragan. Manéhna geus buleud tékadna rék diajar heula silat saméméh bener-bener ngawujudkeun kana cita-citana, jadi Betmen.
Aki Uko lain jalma anu korét ku élmu. Si Kemed langsung diajarkeun silat ku manéhna. Dina waktu anu samporét, si Kemed geus bisa sababaraha jurus.
“ Minangka awalan mah, tah ieu heula wé ku manéh ulik, “ jurus Kuya Nagkub Katincak Peucang!” ceuk Aki Uko.
“ Wah, bangun jurus ahéng éta mah , Bah?”
“ Lain ahéng deui siah. Aki ngulik ieu jurus nepi kana lima bulanna. Da bari ditapaan sagala handapeun tangkal jéngjéng tukangeun imah Aki!”
“ Heug… sok atuh siga kumaha tah jurus ‘ Kuya Nangkub katincak Peucang téh, Ki!”
“ Kieu…. Leungeun duanana ka hareupkeun. Suku kénca jeung katuhu ka tukangkeun. Sirah tungkul saeutik. Terus tapak deku. Terus nangkuban. Tah siga kieu… tenjo aing kéhéd lain nyony’o hp baé, dibajég siah. Teu eucreug diajar silat téh!” Aki Uko masih nangkuba. “ Teundeun heula éta HP!!! Bisi dipékprék ku aing!”
“ Beuh si abah meni galak!”
“ Sok turutan uing siga tadi!”
Si Kemed nurutan gerakan anu dicontokeun ku Aki Uko. Manéhna geus nagkuban gigireun Aki Uko.
“ Ngan sakieu, Ki?”
“ Heueuh… tong ééléngéhan siah… siga lalawora nya ieu jurus? Padahal ieu téh jurus anu langka. Empu Gandring baé nepika ngalalana ka Tatar Sunda kusabab hayang boga ieu jurus siah. Ieu jurus téh diciptakeunna ku Raden Gagalaksak Ringrang Karep.”
“ Heueuh. Ari gunana naon? Moal enya lamun gelut ngadon ngadapang baé kawas kieu, atuh meureun ngadon digebugan ku musuh, Ki!”
“ ieu lain jurus keur gelut, tapi jurus keur nyalametkeun diri!”
Jung Aki Uko nangtung.
“ Hudang! Isukan urang tuluykeun kana jurus anu lain!” ceuk Aki Uko.
Satengah bulan lilana Si Kemed diajar silat di Aki Uko urang Babakan Kenyot. Geus cangkem kana lima puluh jurusna. Katénjo ayeuna mah dina cara jeung gerak-gerik awakna rada gesit.
“ Aing kudu nyieun baju betmen. Ngan aing kudu boga batur. “ sajongjongan si Kemed mikir. “ Heueuh, si Aip jigana daékeun jadi si Robin. Si Aip pamuda Cihérang , najan leuleus tapi boga sumanget.
“ Aip, daék manéh maturan déwék. Urang duaan kudu nyalametkeun ieu nagara méméh nagara ieu bener-bener titeuleum. “
Si Aip unggeuk.
“ Déwék jadi betmen, silaing jadi robin. Kumaha?”
“ Hayang jadi Gatot kaca uing mah, Kang!”
“ Euh.. ari silaing… moal enya Betmen jeung Gatot Kaca?”
“ Uing daék maturan akang, ngan embung jadi robin. Uing mah hayang jadi Gatotkaca. “ Si Aip keukeuh kana pamadeganna.
“ Nya heug atuh tibatan euweuh batur. Keun lah betmen partnerna Gatotkaca ogé..”
Isukna si Kemed langsung ngajait ka Rahmat Tailor hareupeun terminal Degung.
“ Badé sakola TK deui sanés, Pa?” Tanya tukang jait bari nilik-nilik si Kemed. Waktu si Kemed ménta pangjaitkeun baju Betmen jeung Gatotkaca.
“ Bisa teu??? Lamun teu bisa déwék rék mesen ka tukang jait anu lain !”
“ Tiasa atuh, Pa. Antosan paling tilu jam ogé réngsé!”
Baju betmen jeung Gatot kaca geus bérés. Ku si Kemed jeung si Aip dicobaan.
“ Gagah teu déwék?” Tanya si Kemed ka si Aip.
“ Lumayan. Ngan awak kurang badag!”
“ Ah, betmen mah lain Hulk siah Aip!” ceuk si Kemed bari pepeta. “ Dagoan aing garong-garong nagara. Siralaing moal waka ngeunah saré salila betmen jeung Gatotkaca masih kumelendang!” si Kemed ngangkat leungeun katuhu semet dada siga Hitler keur ngahormat. “ Sabarahaeun ngajait téh?”
“ Saratus rébu baé, Pa!” cceuk tukang jait.
“ Uluh… mahal-mahal teuing? Tapi keun wé, salaku pahlawan rahayat leutik betmen moal tuwur-tawar. Tah cokot saratus rébu, keun baé pulanganna cokot jang meuli manggula karet. “ ceuk si Kemed ngasongkeun duit anu gedéna saratus rébu leuwih lima ratus pérak.
###
JAKARTA. Acara sidang paripurna keur lumangsung di gedung DPR. Para wakil rahayat keur ngabahas kudu jeung henteuna ngawangun gedong DPR anyar. Mani cékcok, paraséa jeung gandéng euweuh bedana di gedong DPR téh jeung di pasar. Paciweuh antara anu nyatujuan kudu diwangunna gedung anyar jeung anu nganggap lamun ngawangun gedung anyar sarua jeung ngaraheutkeun hate rahayat. Éta acara téh disiarkeun langsung ku sababaraha tv nasional.
Keur anteng adu rényom. Kocéak, salah saurang anggota DPR ngagorowok bari nunjuk ka luhur.
“ Itu ada kelelawar besar sedang menggelantung di langit-langit. Interupsi pimpinan!!!!”
Bener ogé, dina lalangit gedung DPR aya anu gugulantungan dua urang. Anu hiji make baju betmen, anu hiji deui siga Gatotkaca.
“ Huahahahahaha…..” si Betmen seuri. “ Ngaradon paséa teu puguh wé siahnya di dieu téh. Kos nu heueuh merjuangkeun aspirasi rahayat leutik, nu puguh mah bébéakan merjuangkeun kapentingan golongan.” Ceuk si Betmen bari gugulantungan.
“Security tolong tangkap itu kelelawar raksasa!” ceuk pimpinan DPR.
Kabéh kaméra nyorot ka si Betmen anu anteng gugulantungan dina lalangit gedung DPR. Kabéh anggota DPR nyumputkeun iPAD, Galaxy Tablet jeung smart-phonena, da bisi kafoto ku wartawan anu paciweuh juprat-jeprét.
Pasukan kaamanan arasup ka gedung DPR marawa rupa-rupa pakarang. Sabagian anggota DPR ngabingbrit kalaluar, sing jarerit.
“ Interupsi pimpinannnnnn…. Interupsi!!! Sidang ini harus segera ditutup pimpinan. Ini gawat!!!” ceuk salah saurang anggota dewan.
“ Interupsi pimpinan…!”
“ Interupsi!!!”
“ Interupsi!!!”
Pimpinan sidang culang-cileung, teu puguh cabak.
“ Iya nich sepertinya sidang harus ditutup untuk sementara!”
Si Betmen jeung Gatotkaca beuki motah, anteng gugulantungan dina lalangit gedung DPR bari gogorowokan.
“ Selamatkan Negara ini dari politisi-politisi jahat yang mementingkan kelompok dan golongan. Bersihkan Negara ini dari politisi-politisi porno!” ceuk si Betmen jeung Gatotkaca kompak.
Pasukan kaamanan bisa néwak si Betmen jeung Gatotkaca. Éta dua mahluk dibawa ka Mabes Polri rék ditalungtik naon kasang –tukangna ngacaukan sidang paripurna.
Kabéh media éléktronik jeung citak ngaberitakeun kajadian di gedung DPR. Foto si Betmen jeung Gatotkaca ngaramékeun kaca tepas kabéh Koran jeung majalah.
Sabulan ti harita. Si Kemed jeung si Aip dibalikkeun ka kampung Cihérang. Hasil sidang paripurna deadlock, pangwangunan Gedung DPR anyar teuing kumaha jujutanna, masih jadi polemic antara anu satuju jeung anu nolak.
Beledug, bom ngabeledug di salah sahiji Mall di Jakarta. Kabéh media ngaberitakeun éta kajadian. Obrolan di warung, jalan, imah, jeung disakuliah Indonesia ngabahas éta ngabeledugna bom.
Si Kemed anteng ngoprék HP Androidna, manéhna muka email teuing ti saha, anu eusina. “ AKSI MU TELAH MENGALIHKAN KASUS-KASUS BESAR KAMI. KIRIMKAN NOMOR REKENING BANK. MINTA BERAPA PUN AKAN KAMI KIRIM. DAN AKSI KAMU SELANJUTNYA SANGAT KAMI TUNGGU. BRAVO!”
Si Kemed ngahuleng.
KANG WARSA
Posting Komentar untuk "SI KEMED, BATMAN KASARUNG"