Loba babaturan anu nanya ka kuring, capres mana anu arék di pilih dina tanggal 9 Juli 2014? Nanya kitu téh meureun pédah kuring masih dipercaya gawé di KPU Kota Sukabumi. Jawaban kuring ngan hiji, RUSIAH. Lain embung ngabéjakeun pilihan, tapi kabeungkeut ku hiji hal anu kudu tetep dijaga salaku pagawé di hiji lembaga anu mintonkeun nétralitas.
Naha bener anu ngaranna nétralitas téh aya? Lamun nénjo kana kaayaan jalma salaku subyék, sabenerna euweuh jalma anu nétral, kari-kari hirup mah dipinuhan ku pilihan. Ngan, ari ceuk Undang-undang mah, anu disebut nétral téh henteu ponténg kanu konéng atawa cueut kanu hideung, henteu ngaheulakeun kapentingan pribadi atawa golongan, kadieunakeun mah henteu nénjokeun teuing, saha anu arék dipilih ku urang.
Atuh bohong ari kitu mah anu ngaranna nétralitas téh, da buktina masih kénéh boga pilihan? Kusabab aya anu arék dipilih, geus tangtu haté leutik mah bakal boga rasa leuwih ka anu arék dipilih ku urang? Atuh ari kitu mah, para panata calagara Pemilu ti mimiti KPU nepi ka KPPS kudu dicabut heula hak pilihna salila jadi “penyelenggara pemilu”. Ari idéalna mah kitu, siga baheula anu ngaranna TNI-POLRI teu miboga hak pilih, sabab dua lembaga nagara ieu kudu ditutup aksés politikna.
Lamun dilenyepan kalawan aposteriori, sikep nétral para “penyelenggara pemilu” lain harti kudu dicabut hak pilihna. Da éta mah hak. Anu kudu dilaksanakeun jeung dipintonkeun ku para “penyelenggara pemilu” ka masyarakat nyaéta kawajiban-kawajiban salila dines. Salah sahiji kawajiban “penyelenggara pemilu” nyaéta nanjeurkeun asas-asas pemilu, salah sahijina nétral jeung miboga intégritas, dua kecap anu gampang diucapkeun tapi beurat dibuktikeun.
Lamun aya anu nanya ka kuring, akang arék milih Prabowo atawa Jokowi? Jawaban kuring ngan hiji: RUSIAH. (*)KANG WARSA |
Posting Komentar untuk "Rusiah"