Dibandungan jeung dirarasakeun mah asa beuki lieur kawijakan réjim ayeuna. Anu béda pilihan waktu pilprés taun kamari mah jigana mupuas. Nya lolobana kitu, da ieu mah pangalaman jalma anu di harandap, malahan anu taun 2014 milih pasangan Jokowi-JK ogé milu ngarasula. Hartina, mémang anu milih waktu Pilpres 2014 téh ngan saukur pipilueun baé. Nya kumaha usum baé, ramé ieu milu ka ieu, ramé itu ogé milu ka itu.
Tapi teu saeutik anu angger mertahankeun kayakinan jeung patékadanna. Majarkeun, kawijakan-kawijakan anu ayeuna diterapkeun di nagara urang ku réjim Jokowi-JK téh mangrupa ubar, ngaranna ubar pasti pait tur peuheur. Lamun nilik kana alesan éta, hartina anu keur gering téh lain nagara atuh, tapi rahayat sorangan. Kamandang samodél kitu tangtu mangrupa “pangéjék” keur rahayat mah, saolah rahayat téh keur garering anu kudu gancang diubaran.
Hal anu sabenerna keur lumangsung justru sabalikna. Anu keur garering téh gening pamaréntah sorangan anu boga tékad hayang ngubaran ieu nagara anu keur gering. Taun 1970-an mah Shariati salah saurang ahli fikir ti Iran ngedalkeun, nagara anu keur gering mah kudu dicageurkeun ku dokter lain digugulung ku anu gering deui.
Loba anu nanya ka kuring, naha ayeuna mah mahasiswa téh kurang réspon kana kawijakan ti pamaréntah anu kurang ‘populis’? Aya sababaraha pasoalan anu kudu diguar kalawan daria. Kahiji, mahasiswa jeung rahayat geus béak kedal jeung tarékah dina méré papatah ka pamaréntah ayeuna. Ieu alatan, ‘heuras pamatukna’ pikiran pamaréntah ayeuna anu dibulen ku kecap: “kerja..kerja…kerja!” Gawé anu rancagé meureun maksudna mah, padahal di sisi séjén anu ngaranna rahayat leutik mah asa geus biasa digawé beurat téh.
Kadua, kaayaan nagara ti saprak réformasi mémang geus méngpar jauh jeung sumanget Orde Lama ogé Orde Baru, malah geus teu sapagodos deui jeung sumanget Orde Réformasi sorangan. Salila 17 taun, rahayat leutik diwewelan ku rupaning pasoalan anu dibalukarkeun ku kawijakan-kawijakan anéh ti luhur. Antukna, mahasiswa jeung rahayat geus waregaheun méré pépéling ka pamaréntah. Da teu didéngé kusabab sikep ‘mérékedeweng’ pamaréntah sorangan.
Ngan, dina hiji mangsa, lamun réjim Jokowi-JK tetep pageuh kana sikep ‘mérékedewengna’, rahayat bakal beuki seueul jeung murel. Nalika rahayat geus kitu, ulah nyalahkeun sok sanajan réjim Jokowi-JK dihasilkeun ku sistem démokrasi, dina waktuna mah réjim samodél kitu bisa digulingkeun deui ku ‘mosi teu percaya’ ti rahayat. Tong mopohokeun kana sajarah, sakumaha agung jeung linuhung kakawasaan Kakaisaran Romawi, rungrug saharita ku saurang filsuf anu boga ngaran Cicero, komo ieu mah saukur réjim atah jeung anyar anu karék sataun hasil tina Pilpres 2014, kacida gampang dirugrugkeunna. Lamun rahayat rempug jukung sauyunan.
KANG WARSA
Posting Komentar untuk "Réjim Merekedeweng Jeung Heuras Pamatuk"