Apep Jeung Helios

Loba anu ngabroadcast dina Grup WhatsApp, eusina: Pakai baju tebal malam ini. Ceuk élmu pangaweruh widang fisika jeung astronomi, srangéngé keur aya dina titik paling jauh ieu bumi, kana 152 juta Km.

Ditilik kana kecap, aphelium atawa aphelion diwangun ku dua kecap Apep (déwa anu ngamusuhan panon poé) jeung helium. Jauh saméméh jalma nepi ka mangsa kamotékaran pangaweruh (élmu pasti). Masarakat di tiap wewengkon miboga pamadegan yén helios (Déwa Srangéngé) mangrupa hiji déwa anu ngahirupan pangeusi Bumi.

Rupaning sebutan ka ieu Déwa, di Yunani sorangan Helios idéntik jeung Apollo. Di Mesir disebut Amun Ra, di Romawi disebut Helium atawa Solis, malahan di tatar Sunda aya sebutan keur ieu déwa Rha-Hyang, Surya diadaptasi tina mitologi India, jeung S-Rha Ngh. Hartina mah cahaya nu teu pareum-pareum. Nepi ka dina mangsa kakawasaan Romawi mah aya sebutan Sol Invictus.

Di wewengkon beulah kulon Asia saperti Arab jeung Yahudi, sebutan keur déwa srangéngé nyaéta Shamash, dikana Basa Arabkeun jadi Syams (شمس). Mangsa Arab Jahiliyah, ieu déwa ditempatkeun di jero Ka'bah jeung 359 déwa séjén, mangrupa hiji patung anu ditempatkeun deukeut jeung Hubal mangrupa déwa pang pinunjulna dina mitologi Semit.

Hawa peuting karasa tiris ceuk urang Yunani Kuno mah dilantarankeun éléhna Helios ku déwa Apep. Kadé lain Kang Apep urang Sukabumi.

Kang Warsa