Taun ajaran 1992/1993 geus dimimitian, kuring geus asup SMP. Béda jeung sakola séjén, mangsa harita kusabab sababaraha kelas di SMP Negeri 3 dijadikeun kelas témporal keur pamilon atikan SMP N 8, kelas 1 SMP N 3 kabagéan sakola beurang, saréngséna kelas 2 jeung 3 bubar. Iwal ti éta, sababaraha kelas ogé, harita téh keur dirénovasi.
Sebut baé kuring asup ka sakola anyar, cara jeung métode anu diterapkeun ogé geus tangtu anyar. Umpanana, nalika SD kénéh mah guru mata pelajaran téh ngan saurang, nyaéta guru agama. Nincak SMP mah, kabéh guru anu ngatik pamilon mangrupa guru mata pelajaran atawa guru bidang studi. Lain guru kelas deui, tapi séwang-séwangan guru nyekel jeung ngajar mata pelajaran anu béda.
Mata pelajaran jeung bahan ajarna ogé nambahan, salah sahijina Tata Buku atawa Pembukunan. Guru mata pelajaran Tata Buku nyaéta Bu Eti Sumiati. Bisa disebut guru anu sedeng galakna, hartina galak henteu teuing, ngan keukeuh baé ari ka siswa bageur mah geus pasti bageur.
Di kelas hiji pisan kuring jeung babaturan saentragan diwanohkeun kana buku kas ku Bu Eti. Rupa-rupa geuning, aya anu bentukna scontro, staffel, jeung tabelaris. Kudu apal cangkem kana istilah jeung définisi tata buku, da kitu ilaharna diajar mangsa harita mah.
Jinis ulangan mah ampir sarua jeung mangsa kiwari, aya formatif, sub sumatif, jeung sumatif. Sakola ogé nyiapkeun lembar jawaban keur ulangan sub sumatif jeung sumatif, dibundelkeun, hargana Rp. 1.500-an sabeundeulna. Ieu lembar jawaban anu disiapkeun ku sakola bisa disebut minangka lembar jawaban sah. Jadi tiap pamilon atikan teu bisa ngagunakeun kertas séjén iwal aya dispénsasi ti sakola.
Bu Eti ampir tiap tungtung bulan ngayakeun ulangan sub-sumatif, sual anu dibikeun ka barudak biasana uraian, sangkan para pamilon atikan bisa mindahkeun transaksi imajinér kana buku kas. Pamilon atikan anu meunang peunteun kurang ti angka lima biasana kudu nedunan HER (Hari Evaluasi Remediasi), anu matak sok mindeng diucapkeun, "manéh mah di-her!" Dunya atikan modérn mah nyebutna rémédial.
Istilah samodél di-her, mertélakeun, yén ieu kecap geus langka digunakeun. Ngan masih sok dikedalkeun nepi ka akhir taun 90-an atawa sanggeus dunya atikan asup kana reformasi munggaran. Istilah anu mindeng disebut salian ti rémédial nyaéta ngulang deui, ulangan deui, jeung kecap séjénna anu nuduhkeun lamun peunteun pamilon atikan teu nyumponan niléy rata-rata.
Bu Eti mindeng pisan ngayakeun ulangan, sarua jeung mindengna ngaluarkeun kekecapan: " manéh di-her!!!" ka siswa anu niléyna teu nepi ka angka genep. Harita mah standar kalulusan siswa atawa Kompetensi Kelulusan Minimal (KKM) téh ngan nepi ka angka 6, jeung niléyna mémang original lamun dibandingkeun jeung peunteun siswa mangsa kiwari.
Sok baé, bandingkeun peunteun siswa pinunjul (juara umum) mangsa harita geus pasti éléh ku peunteun siswa mangsa kiwari anu kawilang masih rata-rata dina pangaweruhna. Hal ieu dilantarankeun ku sikep manipulatif sakola sangkan disebut geus lulus jeung nedunan KKM.
Bu Eti jeung guru-guru séjénna katelah guru anu pamohalan méré peunteun kitu baé ka para pamilon atikan, komo méré peunteun syafaat ka para pamilon atikan mah. Lain medit ku niléy tapi keur ngadidik para siswa atawa pamilon atikan sangkan jadi barudak anu jujur, teu réa ngamanipulasi, da engké ogé bakal katénjo hasilna dina Ujian Nasional atawa UAN.
Anu matak teu salah, kusabab didikan samodél kitu, generasi harita bisa disebut mangrupa generasi emas atawa golden ages dina sajarah kahirupan bangsa urang. Ogé jadi generasi panungtung dina mangsa kadigjayaan ngahijina norma, tradisi, jeung pra-modérn. Bu Eti jeung para pamilon atikan mangsa harita bisa disebut generasi panungtungan anu nyakséni kahirupan transisional dina millenium kahiji.
Posting Komentar untuk "Guru: Bu Eti Sumiati"