Poé ieu, pasangan Muraz-Fahmi dilantik salaku Walikota jeung Wakil Walikota Sukabumi 2013-2018. Dina poé ieu pisan, Kota Sukabumi miboga deui pamingpin anyar anu baris mawa Kota Sukabumi kana hal anu dicita-citakeun sakumaha dina visi jeung misi pasangan Muraz-Fahmi. Hal anu alus, salah sahijina, lamun Pamingpin anyar ieu lain saukur bisa ngabuktikeun hal-hal sakumaha anu diébréhkeun dina visi jeung misi ieu pasangan, ogé kudu neruskeun hal-hal alus anu geus dilakonan ku Pamingpin saméméhna.
Sakumaha niténan kana hasil Pemilukada Kota Sukabumi 2013, pasangan Muraz-Fahmi anu dirojong ku tilu partéy; Démokrat, PKS, jeung PKB pinunjul jadi calon anu dipilih ku masyarakat kalawan béda 68 sora ti pasangan Mulyono-Jona. Sacara politis, béda 68 sora ieu nunjukkeun aya kasaimbangan antara pamilih anu ngarojong Muraz-Fahmi jeung anu milih ka Mulyono-Jona. Geus puguh lamun dua pasangan séjénna dihijikeun mah, antara sora anu meunang jeung anu éléh téh meureun loba kénéh sora anu éléh.
Ngan, sistim pemilu di mana baé ogé teu némbongkeun ayana stambus accord, da sistim pemilu sakumaha aturan jeung undang-undang anu aya nyaéta seja milih pasangan calon anu leuwih pinunjul meunang sora di calon-calon anu séjénna. Sanajan ngan béda 1,2 atawa 68 sora, keukeuh baé anu jadi jawara dina Pemilukada Kota Sukabumi téh nyaéta pasangan Muraz-Fahmi. Hiji hal anu kudu dipihormat, lamun enya urang salaku jalma anu arék nanjeurkeun démokrasi kalawan bener.
Pasangan Muraz-Fahmi, sakumaha hasil Rapat Pleno KPU Kota Sukabumi meunang 55.437, leuwih 68 sora ti pasangan Mulyono-Jona anu meunang 55.279 sora. Méré hiji peta politis statis, Pemilukada 2013 béda jauh jeung Pemilukada 2008. Dina Pemilukada 2008, pasangan Muslikh-Mulyono meunang sora nepi ka 50% tina jumlah partisipasi anu milih. Peta politik statis ieu méré hiji totondén, pamaréntahan anu diluluguan ku Muraz-Fahmi di Kota Sukabumi, ka hareupna kudu ngaheulakeun kompromi politik, konsénsus politik jeung partéy-partéy anu ngarojong pasangan calon séjén.
Tapi, ayana kelompok oposan dina widang pamaréntahan di nagara urang teu ditangtukeun ku hasil Pemilukada atawa pilprés wungkul, ogé diukur ku hasil pemilu législatif. Lamun niténan peta politik statis hasil pemilu 2009, tilu partéy anu ngarojong Walikota jeung Wakil Walikota anyar miboga bekel anu signifikan kalawan 13 korsi Anggota DPRD ; Démokrat( 7 Korsi ), PKS( 5 Korsi), jeung PKB (1 Korsi). Leuwih pinunjul tibatan jumlah korsi anu ngarojong pasangan séjén; Mulyono-Jona dirojong ku PDIP jeung PPP ; 7 korsi. Andri-Dangkih dirojong ku Partéy GOLKAR jeung Republikan; 6 Korsi. Sanusi-Yeyet dirojong ku 18 partéy; 4 korsi. Peta politik ieu méré tanda lamun kapamingpinan Muraz-Fahmi salila sataun ka hareup bakal meunang dukungan ti parlemén, kajaba lamun partéy-partéy anu ngarojong pasangan anu éléh dina Pemilukada 2013 teu méré pangrojong ka pasangan Muraz-Fahmi, komposisina bakal leuwih loba jumlah korsi anu nolak kana kawijakan-kawijakan pasangan Muraz-Fahmi ka hareupna.
Hal penting anu kudu dilakonan ku pamingpin anyar nyaéta, ngayakinkeun masyarakat ku nyumponan naon baé anu dicaritakeun dina waktu kampanye. Komo lamun nénjo kana misi anu kudu dicumponan ku pasangan Muraz-Fahmi seja nanjeurkeun pamaréntahan anu Rahmatan lil aalamiin, hiji pamaréntahan anu kudu méré kaadilan, kanyaah, jeung kaasih ka sakumna pangeusi alam dunya, tangtu kudu dibuktikeun dina mangsa ka hareup. Masyarakat lain hiji kelompok oposisi malahan moal nempatkeun dirina jadi kelompok oposisi salila pamaréntahan bener-bener aya dina galur anu dipiharep ku masyarakat.
Bukti nyata pasoalan anu bakal ka sorang ku pasangan Muraz-Fahmi dina ngokolakeun masyarakat Kota Sukabumi di antarana; ngabebenah infra-struktur Kota Sukabumi utamana pasar jeung patali marga. Ngabéréskeun kumaha beuki rongkahna PKL/Pedagang Kaki Lima anu beuki nyéréd ka puseur dayeuh anu beuki minuhan trotoar jalan-jalan protokol, jeung kudu bisa ngawangun hiji tata ruang publik masyarakat Kota Sukabumi anu pikabétaheun.
Dina widang seni jeung budaya, dina prakna Kampanye sababaraha bulan ka tukang, pasangan Muraz-Fahmi méré jangji, arék ngawangun jeung mindah fungsikeun gedong anu kudu dijadikeun Gedung Kesenian Kota Sukabumi. Geus tangtu lain saukur nyieun jeung ngawangun gedong wungkul, ogé boga pancén beurat, nyaéta ngagali poténsi-poténsi seni jeung budaya anu ngakar di masyarakat. Budaya-budaya lokal kudu digali jeung kudu boga stratégi anu hadé kumaha cara ngaronjatkeunna deui.
Keur ngawujudkeun naon anu dipiharep, keur ngawangun Kota Sukabumi mémang ngabutuhkeun partisipasi jeung rempug jukung warga masyarakat. Lamun hal ieu teu dilakonan, naon anu dicaturkeun dina visi jeung misi pasangan Muraz-Fahmi ngan saukur catur tanpa bukur. Masyarakat geus pasti bakal ngarojong kana sagala kawijakan anu mihak jeung nguntungkeun sakumna warga Kota Sukabumi. [ ]
KANG WARSA
Wilujeung kanggo Pa Muraz sareng Kang Fahmi anu siang tadi parantos diintrénan janten Walikota sareng Wakil Walikota Sukabumi 2013-2018, mugia dina sajeroning mancén tugas dipaparinan kakiatan.
Posting Komentar untuk "PAMINGPIN ANYAR KOTA SUKABUMI"