Tadi pabeubeurang aya anu nanya ka Kuring, “ Ari format jeung désain ageman akang naon?” Sababaraha menit kerung, lain mikir kusabab ditanya kitu, tapi Kuring sorangan nanya ka diri, naha geus bener kitu format jeung désain ageman anu ku Kuring dimumulé nepi ka danget ayeuna? Nanya ka diri sorangan lain teu percaya sagemblengna kana ageman hirup ayeuna, malahan ku sababaraha jalma pananya samodél kitu mangrupa hal anu dicarék, pamali jeung nyirikeun kamangmangan.
Anu pangheulana dilakonan ku kuring nyaéta muka dompét, nyidik-nyidik kana KTP, tétéla diserat kecap Islam dina KTP mah. Ngahuleung bari nanya deui kana diri, naha geus saluyu naon anu diserat dina KTP ngeunaan ageman hirup jeung laku lampah? Asana masih kénéh loba anu patojainyah, papalimpang antara harti Islam jeung laku lampah diri. Heueuh, kuring téh ari kitu mah masih kénéh galib jeung batur anu disebut Islam KTP téa meureun.
Ngan bisa peureum bari nafakuran diri, masih jauh kénéh geuning kudu nepi ka laku lampah saluyu jeung ajaran ti Alloh mah. Nya kapaksa baé panyanya ti salah saurangan babaturan dijawab, sanajan éra paradah ari kudu nyebut geus jadi jalma pang soléhna mah.
“Format jeung désain ageman kuring tetep panceug ngagem Katauhidan, nepi ka danget ieu Kuring masih nyekel pageuh lamun zat anu dipigusti ngan Alloh..” Beureum beungeut sabenerna nuliskeun kalimah éta nalika cap Islam KTP masih nerap ka diri kuring.
Sieun disebut pang belegugna mahluk, nyebut diri masih Tauhid tapi masih kénéh sumujud ka pangéran-pangéran anyar saperti; harta, duit, jabatan, jeung kasieun kakurangan banda. Sabab dina sababaraha katerangan disebutkeun, tanda jeung cirri jalma anu geus bener-bener Tauhid mah moal inggis jeung sieun kakurangan ku banda, bakal nikreuh leumpang makalangan kahirupan. Masih sieun kénéh ku jurig jeung sandékala ogé sabenerna geus runtag kayakinan ka Gusti.
Dina sajarah kahirupan di ieu lemah cai, kungsi dicaritakeun kumaha sumerah diri jeung pasrahna Siti Jenar ka Gusti. Dina sababaraha catetan jeung buku diguar, format jeung désain ageman Siti Jenar mémang béda jeung anu diagem ku masarakat umum. Masarakat umum ilaharna nganggap yén kahirupan téh keur nuju kana perlaya, geus hirup bakal maot. Siti Jenar sabalikna, kamandangna ngébréhkeun, manusa jeung alam raya sabenerna mangrupa mayit hirup, perlaya anu keur muru kana kahirupan anu sajati.
Siga fatalism? Lain, fatalism mah hiji kamandang anu diagem ku kaum Jabariyyah. Naon anu diucapkeun ku Siti Jenar ngébréhkeun ma’na filosofis. Harti jerona, kahirupan di dunia téh henteu saukur katalikung ku masalah-masalah duniawi. Duniawi perlu, tapi lain jadi penjara dina kahirupan.
Di luar konték politis, pamikiran Siti Jenar miboga hal positif keur nyadarkeun jalma sangkan henteu katalikung teuing diri ku hal-hal anu karampa ku leungeun jeung katénjo ku panon. Manunggaling kawula gusti lain saukur dilarapkeun dina ma’na lugowi, tapi kudu diteuleumah; bener-bener ngajadikeun hiji (Nauhidkeun) pangaulaan ka Gusti, lain ngaula ka ditu ka dieu.
Dititénan ku konték politis, ageman Siti Jenar samodél kitu tangtu mangrupa ancaman keur pangawasa anu réa nanjeurkeun féodalisme dina kahirupan. Kecap ‘musawwa’ , sarua harkat jeung darajat manusa arék cacah atawa ménak mangrupa ancaman keur kelompok féodal. Da geuning naon anu dikamandangkeun ku Siti Jenar sabenerna keur ngajak ka masarakat sangkan boga tékad; luhurna harkat jeung darajat jalma lain ku pangaruh anu diwariskeun ku karuhun, tapi ku pangarti jeung pangaweruh jalma dina ngahontal kayakinan hirup nepi ka jadi Tauhid anu sampurna. Lain migusti ka raja jeung mihormat ka ménak.
Format jeung désain ajaran anu diagem ku Siti Jenar henteu familiar jeung masarakat umum, antukna dianggap mangrupa ajaran sasar anu ngabahayakeun kana lumangsungna kahirupan umat.
Cindekna, éra jeung beureum beungeut lamun kuring nunjuk ka diri sorangan mangrupa jalma anu geus asa pang soléhna, pang tauhidna, pang Islamna bari laku lampah masih loba anu papalimpang jeung harti pasrah, sumerah, jeung bisa nyalametkeun batur.
Kuring ngusap dada bari ngucapkeun: ihdinash shiroothol mustaqiim… Ya Alloh paparinan abdi pituduh kana kayakinan anu lempeng…
Sukabumi Discovery | Kang Warsa
Posting Komentar untuk "Format jeung Désain Ageman Hirup"