Ceuk kuring, “ Urangna meureun anu ngagedéan, pan baréto mah, enya dua puluh lima taun ka tukang, urang ogé masih budak nongtot lého kénéh.” Ucapan kuring sabenerna saukur ngabeberah diri sorangan jeung nyenangkeun Mang Iday.
Naon anu diucapkeun ku Mang Iday tadi éstu bener. Susukan ngaheureutan, jalan anu karasa kumaha mudun ti tonggoh ka Beulah landeuh téh ayeuna mah karasa rata. Kaayaan susukan – mangsa kuring budak – lega, beresih, jero, loba lauk beunteur, cingir putri, bogo, jeung lélé. Sakali mangsa mah sok katénjo sepat héjo.
Karasa heureutna susukan jeung jalan lain kusabab umur anu nambahan. Tapi mangrupa hiji kajadian fénomena alam anu dibalukarkeun ku jalma-jalma kénéh. Susukan ngaheureutan kusabab ditalud, ditébok bari henteu ngukur sakumaha lega idéal keur hiji susukan, nalika hujan gedé moal ngabalukarkeun banjir, cai limpas.
Jalan karasa ngaheureutan ogé dilantarankeun beuki mahabuna imah jeung wangunan di sisi jalan. Dina ngawangun imah henteu merhatikeun kalawan daria kana Analisa Mengenai Dampak Lingkungan (AMDAL), atuh asa manghérankeun loba jalma ayeuna anu ngawangun imah diparatkeun –tompér- pisan nepi ka sisi jalan. Euweuh tempat Keur trotoar – trotoar acan.
Hal di luhur ngabalukarkeun sababaraha akibat; kusabab jalan heureut, di sisina henteu boga kamalir , nalika hujan cai hujan ngeuyeumbeung di jalan, aspal ogé jadi gancang ruksak. Runtah ti Beulah tonggoh kabawa ku cai hujan, hujan root jalan pinuh ku rupaning runtah. Lamun aya dua mobil perewis ngakibatkeun macét, padahal jalan lembur tapi geus henteu béda jauh jeung jalan di kota-kota gedé.
Geus tangtu kudu aya tarékah ti kabéh pihak sangkan susukan jeung jalan bisa normal deui siga baheula. Kusabab kaayaan ayeuna dibalukarkeun kusabab pangwangunan anu henteu merhatikeun AMDAL, keur ngomékeunna ogé kudu ku cara pangwangunan anu sifatna inovatif - revolutif, merhatikeun AMDAL. Ngan jigana rada hésé lamun pangwangunan dilakonan saukur tambal-sulam wungkul mah, siga pangwangunan di urang ayeuna, lolobana mah nambalan naon anu ruksak tapi teu ditalungtik naon akar sabenerna karuksakan jalan, susukan, jeung réa-réana deui.
KANG WARSA
Posting Komentar untuk "Jalan Jeung Susukan Anu Ngaheureutan"