Abah Saéb Tukang Tarompét Ti Pasar Saptu

Bah Saéb Jeung Mang Iday

Geus asup usum hujan, tandana? Cai ngeuyeumbeung di jalan, lain dipinuhan ku cai leuncang, jalan ogé pinuh ku rupa-rupa runtah, utamana plastik. Di hiji sawah, jalan anu brasna ka Cibodas, lebah péngkolan ka SD Cicadas, katénjo ku kuring hiji aki-aki keur ngaberesihkeun sawahna tina runtah plastik, dina cara ngabalangkeun runtah teu bisa nyumputkeun kakeuheul, teuing ka saha.

Méméh wanci manceran, prul hujan girimis geus turun. Kahayang mah ngebut dina motor, ngan kuring sok ngukur ka kujur, lain Valentinno Rossi, katambah jalan pinuh ku keusik, sok nyeureuleu ban motor nalika dierém. Nya antukna tumpak motor ogé ngeteyep baé lalaunan.

Anu arék dituju lain sasaha, kuring jeung Iday – salah saurang babaturan – rék nepungan salah saurang jalma anu ulukutek kana widang seni, nya sebut baé budayawan atawa seniman pernahna mah. Ngaranna Abah Saéb, lamun éta ngaran dibalikkeun jadi Béas. Geus dalapan taun, manéhna nyieunan tarompét kalayan daria.

Sababaraha tarompét anu dijieun ku Bah Saéb geus dipaké ku tukang niup tarompét. Malah ceuk Bah Saéb sorangan, méméh jadi Walikota Sukabumi ogé, Pa Muraz kungsi sindang ka imah pituin Bah Saéb.

Bisa nyieun tarompét téh asalna mah lain kusabab Bah Saéb bisa, éta mah éstu diajar sorangan. Niron kana tarompét anu geus jadi. Anclubna kana widang seni; penca silat, degung, jeung réog ogé lain kusabab manéhna boga teureuh seniman. Éta mah dilantarankeun ku hiji kajadian, anu jadi incuna nalika diuk di sakola dasar resep menca, ngan ku pihak sakola teu diatik kalawan daria. Aya gerentes, Bah Saéb kudu bisa kana seni Sunda sangkan bisa ngalatih anu jadi incu sorangan.

Di wewengkon Pasar Saptu mah, lain Bah Saéb wungkul anu anclub kana widang seni Sunda téh. Aya ogé Kang Badru anu daria ngokolakeun barudak kana menca jeung ngawayang golék. Unggal poé Saptu, barudak anu masih sarakola diatik menca jeung silat.

KANG WARSA

Location:

Berbagi :