Pa Tatang salaku guru di SMP Negeri 7 Kota Sukabumi, nyel kuring boga pikir, tilarna téh saheuleut reujeung Kurikulum 2013 anu sok dibasakeun kurtilas. Émang euweuh hubunganna, ngan lamun dihubung-hubungkeun mak kapanggih korélasina. Cag henteu kudu dijelaskeun.
Inget ka Pa Tatang suwargi téh nalika keur leutik, harita réng pangajian subuh, brul barudak kaluar ti masjid paheula-heula. Lain arék galasin atawa bébénténgan, tapi muru ka hiji imah anu ayeuna dicicingan ku Pa Kosam. Imah Kang Didin dikontrak ku hiji awéwé, camperenik geulis, kulit sampulur konéng. Hanjakal, éta awéwé boga pagawéan salaku PSK.
Keur ukuran urang lembur mah, ayana PSK anu cicing di lembur sok mawa akibat, opat puluh suhunan imah bakal seuseut rejeki, bakal tumiba rupa-rupa balahi ka lembur, lamun teu diusir atawa dibéré sanksi sosial. Nya, barudak pangajian, barudak narongtot lého kénéh kaasup kuring, nyerang ka éta imah, ngagandéngkeun, bari nyebutan PSK ka éta awéwé. Mang Erus jeung Dadun mah bélaan ngahaja manggul bedug, terus nakol bedug sataker kebek, ngahaja ngagandéngan.
Torojol Pa Tatang, suwargi ngomong, “ Tong kitu, keun baé éta mah kalakuan manéhna. Urang mah amaluna amalukum wé, amal urang keur urang, amal manéh keur manéh!”
Ngaranna ogé barudak, dipapatahan kitu téh karah ngaléléwéan bari jebi. Aya ogé anu ngomong, amaluna amalukum.. amaluna amalukum. Tah ku kuring mah kapikir ayeuna, lamun aya mahasiswa, jalma-jalma ti partai politik, anggota DPR atawa lembaga naon baé anu darémo terus merekedeweung, henteu bisa diatur, teu béda jauh jeung barudak leutik.
Ti saprak Pa Tatang ngomong kitu, ucapan amaluna amalukum téh jadi ngetrénd di lembur mah. Lamun aya babaturan anu maok nangka terus digeunggeureuhkeun ku baturna langsung ngajawab: Sttt… gandéng, amaluna alukum, amal aing amal aing, amal manéh amal manéh. Sarua lamun aya babaturan anu maok lauk di kulah atawa émpang Beulah wétan ogé nalika digeunggeureuhkeun ku baturna langsung ngajawab kitu, amaluna amalukum!
Pa Tatang, kalawan teu langsung geus mere harti kahirupan ka kuring jeung ka sasaha, hirup di dunya mah ulah gampang ngahakiman ka batur. Da hirup mah mangrupa jalan anu panjang, urang henteu nyaho isuk jaga atawa pagéto mah sifat jalma bakal robah. Teu saeutik, urang sorangan bakal diuji ku naon anu diucapkeun. Salila batur henteu ngaganggu ka diri sorangan mah antep baé, da anu ngaranna pangadilan ti Alloh mah bakal tumiba ka diri sewing-séwangan. Hirup di dunya mah kudu digedékeun akur ka batur, soméah ka sémah.
Mugia Pa Tatang suwargi ditampi sagala amal kasaéanna ku Alloh SWT.
Kang Warsa
Posting Komentar untuk "Amaluna Amalukum"