Anu dimaksud ku Kuring nagara tatangga lain Malaysia atawa Bruney, ieu mah nagara urang sorangan. Ih, naha maké kumawani nyebut nagara tatangga ka nagara sorangan? Apan kampung padumukan, banjar karang pamidangan urang téh lain di mamana, tapi di nagara ieu pisan. Ieu sabenerna lain jejer saujratna, ieu mah kulantaran kontéksna ngijinkeun lamun urang masih jauh jeung nagara anu sakuduna aya dina diri urang. Ceuk lagu mah: Di Sana, tempat lahir beta. Kitu cindekna.
Ramé jeung riweuhna lain lumayan, da ampir tiap usik henteu di luhur ogé di handap. Anu di luhur marabok ku kakawasaan, anu di handap milu lieur marebutkeun kalungguhan anu sabenerna teu kudu diréngsékeun ku cara démokrasi langsung. Umpamana, keur milih ketua RT, RW, ogé DKM , lamun urang salaku rahayat geus bener ngaimpléméntasikeun Undang-undang dina kahirupan mah henteu kudu aya pamilihan langsung, da milih ketua RT nepi ka RW mah teu diatur ku Undang-undang. Keur milih hal-hal anu masih deukeut jeung rahayat mah cukup ku cara aklamasi, pilih jalma anu dianggap inohong di hiji lembur.
Kungsi kacaritakeun, kusabab aya démokrasi langsung pamilihan ketua RW di salah sahiji lembur, masyarakat pabaeud-baeud, silih jebian, kusabab béda pilihan. Pemilihan pupuhu lembur anu sakuduna ngahasilkeun kakompakan jeung rempug jukung téh dicédaan ku hal anu teu pati penting, kadieunakeun dipolitisasi wé. Tah éta kajadian anu keur lumangsung di handap.
Di luhur, katénjona téh asa beuki arowah baé. Marebutkeun kakawasaan, kalungguhan, sangkan diménak-ménak jeung diadén-adén. Para inohong anu di laluhur , ngomong arék merjuangkeun kahayang rahayat téh geuning dina prakna mah ngan saukur catur tanpa bukur. Da buktina mah heunteu kitu, anu lumangsung, maranéhna marebutkeun posisina séwang-séwangan keur kapentingan diri ogé golonganna,
Cik kénéh calon Kapolri anu dijadikeun calon tunggal ku Présidén ditetepkeun jadi ‘tersangka’ ku KPK, da kanyahoan miboga ‘Rekening Gendut”. Heunteu kapalang, rekening anu dipiboga ku budakna anu can manjing umur nepi ka 20 Milyar gedéna. Tuluy kaluar deui kajadian, Bambang Widjayanto dicerek ku Pulisi, da cenah pernah nyieun katerangan palsu jeung nyiapkeun saksi-saksi palsu nalika sidang Sengketa Pemilu Waringin Barat. Badrodin ngomong dina sababaraha média, boga bukti anu kuat.
Lamun diteuleuman kalawan jero, dua kasus antara korupsi jeung malsukeun katerangan (lamun enya di kieuna) mangrupa dua hal anu béda. Ngan kusabab dimimitian ku KPK anu nyerek Budi Gunawan salaku pupuhu di Polri, nya Polri ogé boga andelan keur ngaragragkeun KPK ku cara nyerek Bambang Widjayanto anu kanyahoan mangrupa anggota KPK paling vokal sarua jeung Samad.
Lain cakcak jeung buhaya sabenerna, ieu mah kajadian téh keur tumiba ka lélé jeung belut anu keur resep ubek dina cai kiruh. Keun, rahayat mah urang ngadon ngabandungan jeung ngalalajoanan baé, ulah milu ngubek cai anu geus kiruh, komo pipileun guyang dina caina mah, da engké ogé dina waktu anu geus cunduk mah, lélé jeung belut bakal mabok sorangan.
Aya alusna kitu ogé, padahal saba’da Raja Abdullah tilar dunya, harga minyak dunia nérékél deui. Ngan kusabab aya kajadian ieu, pamaréntah poho kana ucapanna sorangan, harga BBM bakal nyaluyukeun kana harga minyak dunia. Pohoeun atawa mémang geus lieureun da keur anteng misah-misah lélé jeung belut anu paraéh alatan mabok.
Kang Warsa
Posting Komentar untuk "Lélé Jeung Belut"