Ku Kang Warsa
Kuwu Jumena keur meujeuhna lieur, henteu lieur kumaha, dina taun ieu aya lima pangwangunan anu ngandelkeun waragad tina anggaran ti pamaréntah can réngsé kénéh. Lain kunanaon, Pa Camat jeung Dinas Tarlingkim geus ngawanti-wanti pangwangunan kudu réngsé sagancangna, méméh Agustusan kudu geus nepi saratus persén, laporan jeung unak-anikna kudu geus dipasrahkeun ka pamaréntah. Alesanna nyaéta bisi ngahahalang kana dibetuskeunna APBD Perubahan taun anggaran 2016. Pangwangunan anu can réngsé lain pangwangunan biasa, da ieu mah ampir 80% wangunan posyandu anu tohaga jeung sumur artésis.
" Matak muruluk buuk teu pupuguh ieu mah, Ukar!" Ceuk Kuwu Jumena ka Ulis Ukar, ngudud ogé katénjona teu mirasa, haseup dibura-bura kamana nyanghareup. " Cik atuh bantuan mikir kuring téh, asa juwet, da biasana ogé teu kawas kieu pangwangunan téh, lancar wé anu aya taun-taun kamari mah."
" Da sanés di désa urang wungkul kajantenan kieu téh, Pa Kuwu.." Ulis Ukar ngomong dumareda.
" Ah, kuring éra atuh ari kudu disaruakeun jeung désa anu teu bisa méréskeun pagawéan mah. Engké bisi aya tudingan majarkeun kuwu teu bisa digawé, Si Ulis jeung Si Mandor kabisana téh ngan narikan pajeg wé ti rahayat, ari gawé mah teu belul. Komo lamun aya tudingan, boa anggaran téh dicapluk tiheula ku aparat désa, amit-amit, ulah nepi ka kitu!" Kuwu Jumena sumanget. " Sugan pamanggih manéh naon anu ngalantarankeun pangwangunan jadi bolay kawas ayeuna, Ulis?"
" Ari pamendak abdi mah ieu téh dilantarankeun ku kirang riksa sareng parios ti pihak urang, Pa Kuwu!"
" Nya, tuh pan angger baé, kasalahan mah bakal ditibankeun ka urang-urang. Ieu mah masalah anu nyata wé, sugan naon anu kapanggih ku manéh salila nguriling ka tiap dusun jeung RW téh, Ulis?"
Ulis Ukar ngarahuh, ngambekan rada panjang. Panon katénjo geus peuleuyeu, jigana alatan maca teuing draft usulan pangwangunan anu dipinuhan ku angka-angka nepi ka tujuh digit.
" Seueur anggaran anu dianggo henteu saluyu sareng ajuan ti masarakat. Nya ari kitu téa mah apan anu ditunjuk janten panitia pangwangunan téh tim anu dibentuk ku urang-urang kénéh, Pa Kuwu." Ulis Ukar eureun sababaraha rénghapan. " Kedah dikempelkeun ieu mah sadaya panitia pangwangunan, saénggalna, Pa Kuwu!"
" Heueuh bener, éra kuring mah asa kakara ayeuna, saumur nyunyuhun hulu aya kajadian samodél kieu. Enya ogé teu milyaran, tapi éra lah." Ceuk Kuwu Jumena, rada tenang ayeuna mah, " Ngan kadé, manéh kudu ancad laér lamun ngajelaskeun ieu pasualan ka masarakat, éta ogé lamun aya anu nanya. Kadé deuih, bisi aya wartawan anu apaleun, cilaka gedé lamun pangwangunan mangkrak di Cihérang diékspos ku media, arék dikamanakeun beungeut kuring?"
" Nya kitu baé atuh Pa Kuwu. Abdi sareng Si Ika, Si Adut badé ka lokasi-lokasi pangwangunan heula ayeuna mah.!"
" Nya heug, béjakeun ka panitia, kudu tanggung jawab kituh, béréskeun baé sing anca, tong diengké-engké."
Di luar kantor balédésa geus padedet masarakat anu arék nyieun KTP jeung dokumén-dokumén séjénna. Kurang pati dipaliré ku pihak désa da keur sibuk heula mikiran pangwangunan anu can réngsé-réngsé.
" Sing sarabar nya!" Ceuk Ulis Ukar ka masarakat. Ngan sakitu.
" Atuh apan kuring téh perlu ayeuna pisan, kudu aya Surat Katerangan Usaha, Pa Ulis. Mangkaning arék disurvéy poé ieu ku Bank!"
" Rék nginjeum duit ka Bank lain?"
" Heueh, perlu modal, keur dagang goréngan.."
" Engké baé pabeubeurang ka dieu deui. Kuring arék kaluar heula. Pagawé anu séjén ogé keur museurkeun heula pikiran kana pangwangunan. Ulah waka mikiran diri sorangan heula, pangwangunan keur kapentingan umum kudu diheulakeun!"
" Asa teu anggeus-anggeus, ngan pangwangunan wé anu diguar tiap taun téh, Pa Ulis!" Aya anu nyeletuk kitu.
" Hush, budak leutik nyaho naon.!" Ulis Ukar ngagebés.
###
Wanci pecat sawed. Saurang budak karék balik sakola lulumpatan muru ka imahna, dina leungeun katuhu ngiwir-ngiwir calana kolor, warna beureum. Euweuh saurang ogé anu ngageunggeureuhkeun, ngaranna ogé budak leutik. Manggih di jalan, asalna mah éta kolor beureum dialung-alung jeung babaturanna. Ngan waktu éta kolor kacekel ku Si Atip, batur-baturna lalumpatan, sabari ngomong, " Bawa wé ku manéh, keur elap!"
" Aduh, nanaonan manéh téh balik sakola kalah ngadon mamawa kolor, Ujang?" Ceuk Indungna waktu Si Atip mikeun kolor beureum kanu jadi indung.
" Manggih di jalan, Ema. Lumayan wé keur elap."
" Geuleuh deuleu, boa calana jalma gélo éta téh. Dieukeun, arék disalabarkeun."
Ceu Papat ngajugjug ka imah RW Apud. Sapanjang jalan loba anu nanya, calana saha éta, Ceu?
" Teuing, meunang manggih budak di jalan!" Tiap aya anu nanya cukup dijawab kitu.
RW Apud, umur geus kolot, makè kacapanon heula méméh neges-neges kana barang anu dibawa ku Ceu Papat ka imahna. Panonna gular-giler, sakapeung negeskeun kolor beureum, sakapeung deui neuteup ka Ceu Papat bari ngarénghap panjang.
" Naha maké kudu dibawa ka déwék, teu pira ogé kolor, atuh piceun baé!" Ceuk RW Apud bari ngalungkeun kolor beureum ka juru imah. " Sugan téh naon?"
" Aéh, manawi bilih éta kolor beureum téh aya anu ngagaduhan. Alim atuh abdi katempuhan, pajarkeun maok kolor!"
" Nya geus wé balik. Keun pasualan kolor mah ku déwék diuruskeun!" Ceuk RW Apud tandes.
RW Apud tap deui kana kolor beureum, disidik-sidik. Dina pikirna aya kolébat, bener ogé ucapan Ceu Papat, bisi aya anu bogana mangkana éta kolor beureum kudu disalabarkeun. Ceuk urang mah lain barang sabaraha, boa ceuk anu bogana mah barang penting. Kolor beureum diasupkeun kana kérésék ku RW Apud, dina rupa mah alus kénéh kolor téh.
###
" Sugan maranéh anu aya di dieu ngarasa kaleungitan barang anu penting?" Tanya RW Apud ka jalma-jalma anu keur aya di warung Mang Ujang.
" Naon téa, RW?" Tanya Si Kemed.
" Pa RW kituh, silaing mah ka kolot ogé kawas ka sasama baé!" Ceuk Si Ocim.
" Ieu!" RW Apud ngaluarkeun kolor beureum tina jero kantong kérésék.
" Nahaon éta téh? Kolor?" Mang Ujang kaluar ti warungna neges-neges. Anu aya di éta tempat ogé sarua, neges-neges kolor beureum anu diteundeun dina dipan warung. Ngahaja ku RW Apud digilir-gilir.
" Kolor manéh meureun, Ocim!" Ceuk Si Kemed.
" Supaya wé ngawaos téh. Saumur hirup asa can pernah meuli jeung boga kolor modél kieu.!"
" Sugan anu manéh, Ujang. Bisi poho waktu moékeun terus katebak angin, digugusur ku ucing atawa anjing!"
" Lain, kolor déwék mah kabéh ogé warna bodas, sabulan sakali gantina ogé, siah!"
" Jorok manéh mah sakitu boga warung, ganti calana jero sabulan sakali?" Si Ocim nyengéh.
" Maksud déwék, meuli kolor sabulan sakali, Ocim!"
" Hayoh gancang ngaku wé, ieu kolor saha?" RW Apud rada morongos.
" Teuing atuh, Pa RW. Bawa wé atuh ka balédésa, sina diinvéstigasi ku pulisi désa!" Ceuk Bah Uko.
" Lah, piceun wé kana tempat runtah atawa kasusukan, bérés. Naha maké kudu dililieur ku kolor!"
" Heueuh, ku déwék arék dipiceun baé, ngan bisi silaing perlu mah gaé cokot wé, seuseuh heula, lumayan da alus kénéh."
" Najis!" Ceuk anu aya di warung ampir bareng.
" Piceun wé lah. Keun kuring anu tanggung jawab lamun aya anu néangan mah, RW!" Ceuk Bah Uko.
RW Apud ninggalkeun warung, dipencrong ku kabéhan.
" Kolor beureum anu saha nya, euy?" Ceuk Si Kemed nanya ka kabéhan.
" Teuing !!!" Kabéh ngajawab bareng.
###
Wanci pasosoré di Cihérang, komo waktu halodo, matak waas sing saha baé anu nénjo. Alamna masih gomplok ku tutuwuhan, barudak arulin di buruan imah. Teu gandéng ku sora mesin motor mobil kawas di dayeuh. Haseup durukan ngelun, sora embé pating bérélé ti kandang silih témbalan. Tonggérét pating jérété dina tangkal-tangkal garedé. Cahaya srangéngé nembus kana sela-sela tangkal, ngawangun hiji kaayaan anu matak pikabetaheun.
Ti beulah kidul anu brasna ka susukan gedé salah saurang budak lumpat. Mamawa kolor beureum anu baseuh. Belewer dialungkeun ka barudak séjén anu keur meujeuhna resep ulin di buruan.
" Tah calana jero bapa manéh!" Pokna téh sabari seuseurian.
Plek! Kolor beureum ninggang pas pisan kana sirah salah saurang budak. Belewer dialungkeun deui ka baturna. Kolor beureum dialung-alung. Barudak éak-éakkan, beuki loba baé, rob anu di buruan séjén ogé pipilueun ngadon ngalung-ngalung kolor beureum baseuh.
" Kolor bapa sia!"
" Kolor bapa aing mah mérék Crocodile!"
" Kolor bapa sia meureun!"
" Nu bapa sia paling ogé, sakitu geus logor kieu!"
" Kolor bapa sia!"
" Bapa aing mah tara dikolor!"
" Ihh, jorok, gudal-gadél meureun!"
Kitu éak-éakkan barudak dina wanci pasosoré, saruka bungah. Nepi ka kolor beureum baseuh jadi garing. Sabari dialung-alung téh dipeureut heula.
" Bebel, garandéng siah, ngadon éak-éakkan di buruan imah aing!" Si Ocim molotot, karék bérés ngarit jukut keur parab domba di tegalan. Beretek, barudak lalumptan, kolor beureum dialungkeun ku saurang budak.
" Tah kolor Kang Ocim!"
Si Ocim neges-neges éta kolor beureum.
" Beu, geuning ieu mah kolor anu tadi dibabawa ku RW Apud. " Pokna sabari gogodeg. Terus muru ka imah RW Apud.
" Ku déwék mah geus dipiceun ka susukan gedé naha ku silaing ngadon dibabawa deui ka dieu ieu kolor?"
" Harrr, dipiceun kamana ieu téh? Puguh ieu kolor bieu diulin-ulin ku barudak, dialung-alung. Ah, boa teu dipiceun ku Pa RW meureun!"
" Dipiceun, ku déwék dibalangkeun ka susukan!" RW Apud embung éléh.
" Atuh naha, ongkoh dipiceun tapi aya deui aya deui?"
" Kadieukeun sia éta kolor!" Pénta RW Apud ka Si Ocim.
" Ah, ieu mah kudu dijéntrékeun, kudu dimusyawarahkeun!"
" Heueuh kadieukeun heula éta kolorna, seblu!" Kolor beureum direbut, didudut ku RW Apud dina leungeun Si Ocim.
" Arék dikumahakeun deui?"
" Arék diuruskeun, urang bahas babarengan ieu kolor engké peuting jeung inohong lembur!"
###
Ba'da Isya, wanci sareureuh budak, imah RW Apud geus pinuh ku jalma-jalma. Lolobana mah panasaran, naha pasualan kolor baé makè kudu dimusyawarahkeun sagala.
" Ieu kolor beureum asalna ti Ceu Papat, ceunah ti budakna, manggihan di jalan. Terus ieu kolor, tadi beurang ku kuring dipiceun ka susukan gedé, pasosoré dibawa deui ku Si Ocim ka kuring, ceunah ngadon dialung-alung ku barudak di buruan imahna." RW Apud ngajelaskeun ti awal nepi ka akhir.
" Terus kudu kumaha atuh?"
" Mangkana manéh RT jeung inohong lembur diondang ogé keur méréskeun ieu pasualan. Asa lieur déwék mah poé ieu nyanghareupan ieu kolor beureum!"
" Heueuh da diwawarkeun di masjid asa teu pantes nya? Moal enya DKM ngumumkeun kaleungitan kolor?"
" Piceun deui baé atuh ka tempat anu jauh ti ieu lembur. Mani bingung. Ka tegalan atawa ka sawahkeun anu jauh wé..!"
Kabéh sapuk, kolor beureum dina éta peuting rék dipiceun ka tempat anu jauh ti lembur Cihérang.
" Ku silaing wé Ocim piceunna, nya?"
" Nya kumaha wé, abdi mah ngiringan." Ceuk Si Ocim.
Si Ocim leumpang kakidulkeun muru tegalan anu jauh ti lembur.
" Sia, kolor beureum belegug nyusahkeun aing!" Gerentes haténa. Geus jauh ti lembur, belewer kolor beureum anu dibuntelkeun dina kérésék dialungkeun kamana karep. " Nyingkah siah jurig!!!"
###
Bégal anu arék nandasa Kang Ruki, salah saurang patani Cihérang kacida ngarénjag nalika kana sirahna aya anu ninggang. Bakating ku reuwas, Si Bégal lumpat ngajauhan Kang Ruki anu keur nyempod kusabab diasongan bedog.
Kang Ruki muka bungkusan. Asalna mah diciuman sagala, da geus nyalametkeun manéhna tina ancaman bégal anu rék ngarogahala. Dibébérkeun, kolor beureum. Dibungkus deui di bawa ka lembur.
" Duh, lamun euweuh ieu kolor, geus kumaha meureun aing téh!" Gerentes haténa. Dina éta peuting ogé, kolor beureum diseuseuh, ditambahan makè seuseungitan sagala, tuluy dibébérkeun dina sasampayan buruan imah.
Wanci haneut moyan, kaayaan lembur geus ramé deui. Si Kemed gura-giru ka imah RW Apud.
" Kolor beureum téh aya dina sasampayan imah Kang Ruki, Pa RW!"
" Heureuy siah!"
" Bener… tuh keur pada ngagimbung!"
" Gustiiiiii…!" RW Apud kaluar ti imah masih didadamping gagancangan muru ka imah Kang Ruki.
Jalma-jalma keur ngagimbung kolor beureum anu mébér dina sasampayan.
" Ocim, ku sia dipiceun teu?" Tanya RW Apud morongos.
" Sing demi teuing, dilaungkeun ku kuring di tegalan Beulah kiduleun ieu lembur.!"
" Duh mani seungit kieu ayeuna mah kolor téh, Pa RW!" Salah saurang anu aya didinya milu ngomong bari ungsa-angseu.
" Ruki, naha ieu kolor aya dina sasampayan manéh sagala?" RW Apud nanya ka Kang Ruki.
" Duh, panjang lalakonna, anu jelas ieu kolor beureum téh ageung jasana ka abdi. Lamun lain saréat ieu kolor, kuring geus ngabugang kari layon. Ieu kolor beureum pahlawan, Pa RW!"
Kabéh gogodeg. Teu ngarti. RW Apud gagaro henteu ateul.
" Terus arék dikumahakeun ku manéh ieu kolor téh?"
" Ah, badé disimpen baé ku abdi, badé dikanalomarikeun upami tos garing mah!" Ceuk Kang Ruki, pasti pisan.
" Kadieukeun, rék diduruk ku déwék!" Ceuk RW Apud maksa.
" Aéh, ulah… tong kitu manéh abong-abong ketua RW bisa sangeunahna rubat-rebut kana barang anu geus nyalametkeun diri kuring.!" Kang Ruki jadi kasar. " Ulah pédah kolot terus kuring sieun ku manéh, Apud!"
" Ruki, kadieukeun éta kolor beureum, ku aing rék diduruk!"
" Apud, ulah peupeuleukeuk kitu manéh, moal apal manéh mah kana jasa ieu kolor!"
Anu aya di éta tempat ngadon bingung campur keuheul. Naha jadi ngadon paraséa.
" Baralik siah, tong ngadon ngariweuhkeun di imah déwék!" Ceuk Kang Ruki, leungeunna ngarawél kolor beureum dina sasampayan. Lalaunan mundur, jebrudd!! Panto ditutupkeun.
Kabéh silih pelong, olohok ngembang kadu.
" Kumaha atuh ieu téh, Pa RW!"
RW Apud masih ambek, ngahégak asa dilédék ku budak kamari soré.
" Rék dilaporkeun ka babinsa jeung babinmas Kemacatan ku déwék!" RW Apud langsung balik, bari jamotrot.
###
Kuwu Jumena katénjo reuwas nalika ka balédésa kadatangan ku Pa Camat, Babinsa, jeung Babinmas. Hariweusweus, ngabagéakeun.
" Anteurkeun kuring saparakanca ka RW Apud, Kuwu!" Ceuk Pa Camat.
" Aduh muhun, sumangga, Pa Camat." Haté mah gegebegan, da pangwanguna Posyandu di dusun RW Apud karék réngsé 40%.
" Mana jalmina anu nangtang ka Pa RW téh?" Ceuk Babinsa.
Aparat Kecamatan jeung Désa dijajap ku RW Apud muru ka imah Kang Ruki. Kadatangan ku para gegedén mah reuwas lain lumayan, Kang Ruki rengkuh bari mikeun kolor beureum ka Pa Kuwu.
" Naon ieu?" Ceuk Kuwu Jumena, teu ngarti.
" Muhun, gara-gara ieu kolor masarakat di ieu lembur jadi ramé, Pa Kuwu!" Ceuk RW Apud.
" Teras kedah kumaha atuh, Pa Camat?"
" Nya keun baé, ieu kolor beureum rék dibawa ku Babinsa ka kantorna, rék diamankeun!"
" Pa Camat sareng Pa Kuwu, kadé pangjagikeun ieu kolor, ageung pisan jasana ka abdi!" Ceuk Kang Ruki rengkuh campur laun ngomongna.
" Nya tenang wé!" Ceuk Pa Camat. " Aéh asa kaingetan, ari lokasi pangwangunan posyandu di ka-RW-an Pa Apud Beulah mana?"
" Ah caket, palih dinya di RT 2, Pa Camat.!"
" Sabaraha persén deui nepi ka réngsé?"
" Numawi sesah, nyuhunkeun bahan ti panitia ogé, ayeuna nembé kana 40% pangwangunan téh , Pa Camat." Ceuk RW Apud ngajéntrékeun. Leungeunna diciwit ku Kuwu Jumena.
" Kuwu, kadé ah, saminggu deui kudu geus réngsé tah!"
" Aéh kantenan.. kantenan, Pa Camat.!"
Kabéh ninggalkeun imah Kang Ruki.
###
Di Balédésa, Kuwu Jumena keur neges-neges kolor beureum dina méjana. Ku Pa Camat jeung Babinsa teu jadi dibawana, nitah diamankeun baé ku Kuwu Jumena.
" Kolor beureum anu saha éta téh Pa Kuwu?" Tanya Hansip Ika.
" Piceun ku manéh kanu jauh, jung!" Ceuk Kuwu Jumena énténg jeung teu hayang dipusingkeun ku kolor beureum.
" Mangga.. Pa Kuwu!" Ceuk Hansip Ika.
###
" Tah kieu balukarna ari pangwangunan kakalén teu bérés-bérés téh, Pa Kuwu!" Ceuk RW Deden ka Pa Kuwu jeung saparakanca. RW 8 banjir, cai dina kakalén anu can bérés limpas ka jalan, cai minuhan jalan, sababaraha imah kakeueum ku cai semet mumuncangan.
" Sugan aya anu nyocokan tah kana paralonna, éta anu beulah dinya!" Ceuk Hansip Ika. " Coba riksakeun ku manéh, Adut!"
Leungeun hansip Adut ngodomang kana kakalén anu pinuh ku cai.
" Heueuh, aya anu nyocokan geuning, duh ngait euy, miceun runtah téh sangeunahna baé atuh da!" Ceuk Si Adut. " Tah geuning!! Beunang anu nyocokanna!" Pokna bari ngiwir-ngiwir runtah.
" Ika, geuning éta mah…!??" Ceuk Kuwu Jumena.
" Demi Alloh Pa Kuwu, ku abdi dipiceun kana tempat runtah da!"
RW Deden jeung hansip Adut teu nolih kana paguneman Kuwu Jumena jeung Hasip Ika. Maranéhna anteng mersihan kakalén. Kolor beureum anu beyedug ku leutak ku hansip Adut dikocok-kocok, dibersihan.
" Tah, lumayan alus kénéh geuning kolor téh, Paké ku manéh Ika!"
" Najis!!" Ceuk Hansip Ika ngabirigidig sabari mencrong ka Kuwu Jumena anu keur ngusap tarang.
Dikirim dari ponsel cerdas BlackBerry 10 saya dengan jaringan Indosat.
Posting Komentar untuk "Carpon: Kolor Beureum"