Pilkada, Maskot, jeung Baligho

KPU Kota Sukabumi salaku panata calagara Pilkada 2018 - tadi beurang- ngayakeun acara Jalan Séhat. Calagara anu ngalibatkeun pihak sakola jeung para pamilon atikan salaku 'Pemilih Pemula' diayakeun babarengan di sababaraha kota jeung provinsi anu baris ngalumangsungkeun Pilkada, dibéré jejer Serentak.

Pamilon anu ngareuahkeun éta acara kurang leuwih aya kana 500 urang. Ngumpul ngariung di hareupeun balékota, mangrupa simbul yén Pilkada dina taun hareup téh hajat sakabéh warga Kota Sukabumi. Dua bulan saméméhna, KPU Kota Sukabumi netepkeun maskot Kang Balkot, gambar anu bisa jadi wawakil pesen Pilkada 2018 seja milih pamingpin anyar Kota Sukabumi.

Aya béda anu kacida teges antara maskot Pilkada 2018 jeung 2013. Sok sanajan duanana leuwih 'didominasi' ku warna bodas, komo maskot Pilkada 2013 mah dibéré ngaran Ki Bodas, tapi béda dina gambar. Maskot Pilkada 2013 gambar méong bodas, ceuk sawaréh babaturan mah cicirén yén Pilkada 2013 dipinuhan ku rupa-rupa hal anu deukeut ka éwuh-pakéwuh. Basa kasarna mah silih cakar.

Kuring moal panjang teuing ngaguar pasualan mascot ti Pilkada ka Pilkada, Kota Sukabumi bisa disebut leuwih dinamis dina maké maskot. Pilkada 2008 malah ngagunakeun gambar manuk. Dumasar kana hal éta, keur wewengkon Kota Sukabumi saolah can miboga ciri asli jeung utama, masih kénéh rarampa dina netepkeun simbul jeung hal naon anu bisa jadi wawakil Kota Sukabumi dina tiap kariaan.

Dipangaruhan ku kekecapan, Kota Kecil Sejuta Cerita, nu disumebarkeun dina rupaning média sosial, sebutan anu ngeplés ditibankeun ka Kota Sukabumi. Disebut kota kecil da bener -sok sanajan saeutik leuwih gedé dibandingkeun Cimahi- ngan dibandingkeun jeung tilu wewengkon tatangga: Kabupatén Sukabumi, Bogor, jeung Cianjur, Kota Sukabumi bisa disebut budak bungsu. Keuna ku paribasa, ku waktu sapoé ogé Kota Sukabumi mah bisa kaubek, sok sanajan can aya jalma anu ngahaja kukurilingan ngubek Kota Sukabumi.

Disebut miboga sajuta carita mémang bener. Urang sebut baé hal anu lumangsung dina minggu ieu. Galura Pilkada 2018 sabenerna can pati karasa ku masyarakat handap anu disebut 'grass root' atawa 'akar rumput',  kabayang meureun, salian ti akar teh jukut ongkoh. Galura Pilkada 2018 masih mangrupa galura anu meupeuh ka kelompok nu boga kapentingan. Dicirikeun ku lobana spanduk jeung baligho ucapan anu pajeujeul minuhan jalan patumpuk-tumpuk teu puguh, tangtu baé keur sawaréh jalma bisa disebut sareukseuk kana panon.

Spanduk jeung ucapan lain ti gegedén jeung inohong Partéy Politik wungkul, ogé dipinuhan ku potrét jalma anu ngahaja milu boga ngaran atawa 'numpang bekén' kana kawentarna inohong anu aya dina éta spanduk jeung baligho. Gambar jeung logo ormas ogé pagedé-gedé némbongkeun diri saolah miboga lalakon utama jeung boga jasa gedé dina ngawangun ieu wewengkon. Hartina, dina mangsa kiwari geus tumuwuh jalma-jalma anu ngan ukur nokohkeun dirina kucara nangkél kana katokohan atawa popularitas jalma anu mémang geus kawentar salaku tokoh.

Aya omongan, cenah hal éta téh mangrupa bentuk aub jeung jabung tumalapungna urang salaku masyarakat. Hiji bentuk partisipasi masarakat dina ngaramékeun ieu wewengkon, teu bisa ku gawé anu rancagé, atuh ku masangkeun potrét diri dina spanduk jeung baligho. Keur usum sélfie jeung wefie, boh dina dunya maya kitu ogé di dunya nyata. Jalma ngalakonan kahadéan, jeprét ku hand-phone, tuluy diapungkeun kana médsos atawa baligho. Potrét  diri geus lain diteuteup deui ku diri sorangan jeung kulawarga, disimpen dina albeum kulawarga tapi kudu disebarkeun, dibagikeun, jeung kudu kanyahoan ku batur yén urang téh salaku aktor sosialita nu teu katinggaleun jeung embung éléh ku batur sok sanajan ngan ukur saléngkah.

Naha hal éta sah dilakonan? Sah-sah baé, sabab salila ieu can aya aturan anu ngalarang diri urang mintonkeun potrét diri dina média sosial jeung baligho salila teu kacerek ku UU ngeunaan pornografi. Ngan, anu jelas, arék sagedé kumaha baé ogé potrét diri dicitak minuhan sisi jalan, diri urang can tangtu dipikawanoh ku jalma anu aya di lembur-lembur. Malahan ngaran kuring sorangan moal dipikawanoh ku tatangga araranjeun pan?

Location:

Berbagi :