Bu Anik pituin urang Solo, anu matak dina taun 1992, nalika ngajar matématika masih kentel pisan lentong Jawa-na. Ilaharna guru mangsa harita, Bu Anik bisa disebut teges jeung tandes. Sok komo salaku guru matématika mah mémang sakuduna némbongkeun sikep obyéktif, utamana nalika meunteun para pamilon atikan.
Pangajaran matématika antara di Sakola Dasar jeung di SMP karasa pisan bédana. Matéri anu diajarkeun ku Bu Anik nalika kelas 1 salah sahijina nyaéta ngeunaan "himpunan". Jeujeur ajaran anu can kungsi kaalaman ku kuring nalika di SD. Saharitaeun mah, jeujeur ieu bisa disebut matak ngalieurkeun sirah.
Ngan ari dikeureuyeuh kalawan logis mah, nya kuring bisa ngahontal ogé jeujeur jeung matéri matématika salila di sakola. Nya kuring ogé ngarasa reueus, kusabab salila di SMP Negeri 3, ti kelas 1 nepi ka kelas 3 rata-rata peunteun matématika teh 9, ongkoh jadi sarat sangkan béasiswa ti Indomie tetep ngalir, lamun kiwari mah disebutna cair.
Cara ngatik jeung ngajar Bu Anik teges. Nepikeun matéri matématika ka para pamilon atikan daria jeung seurieus pisan. Ilahar, guru matématika, fisika, jeung mapel éksak mangsa harita sok meunang landihan "guru killer" jeung galak.
Sok sanajan, sabenenerna mah lain kitu. Guru ogé jalma, miboga jeung tuhu kana hukum alam, aya aksi jeung réaksi atawa stimulus jeung respon. Guru jadi galak kusabab ngaréspon barudak anu bandel jeung rada "kuled". Mémang idéalna mah, para guru dina nyanghareupan pamilon tipikal kitu téh ku sikep sabar. Ngan da kumaha atuh, guru ogé jalma, nahan sabar ogé kesel.
Sabalikna, guru jadi bageur keur ngaréspon pamilon atikan anu bageur jeung pinter. Da kitu ari dunya mah, mémang sok saimbang jeung nyaimbangkeun dirina sorangan sangkan hukum-hukumna bener-bener adil. Da moal aya guru anu ujug-ujug gantawang nyarékan jeung ngékéak budak anu bageur atawa budak anu keur cicing.
Sok sanajan kitu, sakabéh guru ngalakonan hal éta kusabab nyaah jeung hayang para pamilon atikan téh balageur jeung palinter. Matakan disarakolakeun ogé sangkan jadi budak anu berpendidikan. Teu salah, nalika Bu Anik mintonkeun sikep tandes jeung teges ka para pamilon atikan mangsa harita. Katambah, para pamilon atikan mangsa harita mah mémang kudu ku cara kitu dididikna, da miboga karakter teu pundungan, tara bébéja ka kolot, jeung ajrih ku guru.
Jaman ayeuna, guru, kaasup Bu Anik geus tangtu moal nerapkeun cara ngajar tahun 90-an. Salah sahijina dilantarankeun ku karakter siswa atawa para pamilon atikan jaman ayeuna anu rata-rata, pundungan, gampang lupar-lapor, jeung aya aturan ngeunaan HAM jeung sakola ramah anak. Teu saeutik kaseus , guru dilaporkeun ka nu berwajib kusabab nyiwit siswa. Niat ngadidik jeung ngatik téh antukna jadi masalah gedé keur guru.
Sangkan resep kana matématika, nya kudu resep heula kanu ngarajna kaasup ka Bu Anik. Kuring sok nyaimbangkeun diri, umpamana nalika Bu Anik ngambek di kelas, éta hartinya para pamilon atikan hésé apal cangkem jeung paham kana matématika. Tara langsung nyebut guru téh galak. Da, matak daék ngajar jeung mapatahan ogé kusabab nyaah ka barudak.
Hal ieu, anu ngalantarankeun kuring masih inget ka guru-guru SMP N 3. Malahan inget kénéh kumaha karakter jeung pasifatanna, cara ngajar, metode, jeung paripolahna, kaasup ka Bu Anik. Kusabab kuring ogé ngajar di sakola, sakali-kali sok nyaritakeun kumaha guru mangsa kuring jadi murid dina ngajar jeung ngatik barudak. Teges, tandes, malah bisa disebut galak.
Salaku jalma anu kungsi diajar matématika ku Bu Anik Sutanti, dina danget ieu kuring ngan bisa nganuhunkeun dina ieu seratan. Anu jelas, guru mah euweuh urutna, nepi ka iraha baé ogé bakal disebut guru.
Posting Komentar untuk "Guru: Bu Anik Sutanti"