Tug nepi ka taun 90-an katompernakeun masih aya masyarakat anu ngalakonan kabiasaan silih anteuran kadaharan dina rantang. Biasana dilakonan sapoe samemeh lebaran anu sok disebut poenan takbiran. Eusi rantang geus galib; opor hayam, semur daging munding atawa sapi, bihun, kentang, jeung buncis.
Silih anteuran kadaharan ieu keur sawareh jalma mangrupa pamageuh tali bebesanan, calon besan geus pasti ngirim kadaharan ka pibesaneun. Hal ieu ku barudak jaman now mah bisa disebut "coding", kila-kila atawa tanda: rengse puasa antara saurang jajaka jeung wanoja bakal manjing jatukrami.
Wanoja boga adab jeung tetekon, henteu wani nembragkeun eusi hate ka jajaka, ngan anu jadi kolotna surti, "coding" tanda karesep budak ka jajaka diebrehkeun ku ngirim kadaharan ka pibesaneun. Eusina oge sok rada beda dibandingkeun kadaharan anu dibikeun ka jalma sejenna.
Keur masyarakat biasa, kabiasaan silih anteuran kadaharan mangrupa "custom" anu jadi ciri utama masyarakat gammeinschaft, masyarakat rural padesaan. Silih asaan rejeki, silih asaan naon anu geus dijieun. Iklim komunalisme nu geus matri kalawan pageuh dina ati sanubari masyarakat.
Waktu beuki laju, wanci beuki nyungsi, kabiasaan silih anteuran kadaharan mimiti kagerus ku istilah anyar. Istilah anu dihasilkeun dina lingkungan gasselschaft jeung iklim industri. Hiji istilah anu nepi ka ayeuna geus lumrah disebut-sebut: THR jeung Parsel.
Masyarakat lain silih asaan deui tapi geus ganti ku kabiasaan kabagi atawa kabere tina ladang usaha/kesang nu teu bisa dipisahkeun jeung dunia kapitalis. Leuwih basajan dina cangkang jeung bungkus, cukup ku amplop atawa plastik keur ngantongan baju, samping, jeung kopeah.
Sok sanajan beda cara, kabiasaan, jeung tradisi sahenteuna niat jalma sarua, hayang babagi jeung bura-bere ka batur, hayang kaasaan rejekina ku batur. Teu unggal poe oge, atuh sataun sakali. Ngan angger bae, rasa antara silih anteuran kadaharan dina rantang jeung THR kacida beda. Nu hiji nembongkeun sikep interpersonal, anu hiji deui leuwih nembongkeun sikep saarah ti jalma anu mampuh atawa jegud ka jalma basajan (kokoro).
KANG WARSA
Posting Komentar untuk "Rantang jeung THR"