Lalajo final Piala Dunia taun 1986 di imah aki ti gigir (adi misan nini). Can pati ngarti naon ari piala dunia, duméh harita karék kelas hiji sakola dasar. Iwal ti éta, mangsa harita can kawas kiwari, stasiun tv anu nyiarkeun piala dunia ogé ngan TVRI wungkul. Teu disiarkeun sagemblengna deuih babak final piala dunia téh, dipilihan baé (siaran rékaman).
Réngsé Piala Dunia 1986, Argéntina anu dimotoran ku Maradona jadi wacana jeung wangkongan sapopoé. Anu jadi kolot remen nyaritakeun kumaha pinunjul jeung hébatna Maradona. Sok sanajan ngan saukur ngadéngé dina caritaan, rata-rata barudak harita kalawan teu sadar antukna ngidolakeun Maradona.
Anu jadi kolot mah ngahaja mangmeulikeun kaos Argéntina nomor 10, tulisan Maradona ngajeblag dina tonggong kaos. Keur wadah buku ogé dipangmeulikeun tas gambar/logo Piala Dunia 1986 (Pique). Kebon awi jeung sawah dijadikeun lapang maén bal ku barudak, lamun ngasupkeun bola kana gawang anu dijieun tina tangkal sampeu, barudak langsung lalumpatan jeung saruka bungah sabari ngagorowok: Maradona!
Maradona dipikawanoh ku barudak sok sanajan barudak teu apal bener ka jinisna. Anu jelas, Maradona jago jeung hébat. Mun kiwari mah, tagline Maradona mangrupa “trending topic” dina lini masa médsos. Ampir kabéh jalma ngagunemcaturkeun Argéntina jeung Maradona juara Piala Dunia 1986.
Karék kapikir, naha Argéntina jeung Maradona dipuji jeung dialus-alus di ieu nagara. Aya sababaraha alesan, kahiji, nagara-nagara di Amérika Latin mangrupa nagara dunya katilu atawa berkembang, geus tangtu miboga darajat anu sarua jeung Indonésia.
Kadua, aya rasa sarua anu dialaman ku rahayat di nagara dunya katilu nyaéta pasualan sosial saperti kamiskinan, pangangguran, jrrd. Émpati anu kaluar nalika muji Maradona nyaéta asal-usul ieu pamaén bal téh ti rahayat biasa anu miskin.
Katilu, suasana batin rahayat Indonésia jeung Argéntina ampir sarua. Wewengkon anu miboga poténsi alam jeung sumber daya alam anu rongkah ngan teu dikokolakeun kalawan daria ku pamaréntah sorangan tapi leuwih milih dipasrahkeun ka nagara deungeun (Barat). Kaayaan batin ieu jadi salah sahiji alesan rahayat Indonésia leuwih ngunggulkeun Argéntina jeung nagara-nagara Amérika Latin tinimbang nagara-nagara Éropa.
Ku tilu hal éta geus ngalantarankeun rahayat Indonésia kudu ngarojong Argéntina jeung Maradona dina Piala Dunia taun 1986. Salia tilu bulan, paguneman ngeunaan Argéntina jeung Maradona jadi juara piala dunia terus dilakonan ku masyarakat. Malahan dina bulan puasa mah kecap Maradona sok dipéngparkeun kana lafadz niat puasa: nawaytu shauma godin an adai fardusyahri maradona hadzihissanati.
Masyarakat lembur teu kungsi paduli kana ageman anu dicekel ku Maradona jeung rahayat Argéntina. Teu nolih kana idéntitas. Rahayat di ieu nagara anu mayoritas muslim ngarojong Argéntina jeung Maradona anu ngagem Katolik.
Kadieunakeunna, piala dunia ti taun 1990 tugi nepi ka kiwari disiarkeun ku tv swasta, ti babak penyisihan nepi ka final. Jersey ogé bisa dibeuli di toko-toko anu ngajual pakakas olahraga. Tiap jalma bisa nangtukeun atawa milih tim jeung pamaén bal anu diidolakeun. Kari-kari, tv ogé lain saukur nyiarkeun piala dunia, ampir kabéh liga maén bal bisa dilalajoan ku masyarakat.
Anu ngabédakeun ngan hiji, kiwari jalma-jalma anu ngidolakeun pamaén bola jeung klub sok remen adu rahul bari dibarengan ku ngagogoréng pamaén anu dipikaresep ku batur. Pacogrégan ngeunaan Messi jeung Ronaldo baé tug nepi ka kiwari can aya bérésna. Malahan, kiwari mah pasualan maén bal ogé sok diimplik-implikan ku pasualan idéntitas agama.
Jersey Messi Ludes
Réngsé Piala Dunia 2022, iber dina media nyebutkeun Jersey Messi produk Adidas ludes teu nyésa. Hal anu wajar, pédah Messi geus bisa mawa Argéntina jadi juara piala dunia Qatar. Waktu anu dianti salila 36 tahun ti saprak Argéntina jadi juara Piala Dunia 1986.
Teu jauh jeung Maradona, Lionel Messi anu dilandih la pulga (si kutu) jadi jejer wangkongan balaréa boh dina rohangan nyata ogé dina rohangan maya. Messi ogé meunang sebutan salaku pamaén sépak bola pinunjul sapanjang sajarah.
Nalika ditanya, kuring dina piala dunia Kamari ngajagokeun saha? Pasualan ieu teu leupas jeung mangsa ka tukang, taun 1986-an. Kuring geus tangtu leuwih mgarojong Argéntina jeung Messi waktu ngalalajoan final antara Argéntina jeung Perancis. Ngan tetep bari sadar yén pamaén Perancis ogé kawilang harébat.
Sok sanajan dina média kiwari loba kénéh padungdengan, masih neuteuli kusabab tim anu dirojongna kéok, Messi jeung Argéntina tetep baé juara. Arék téori konspirasi naon baé anu digunakeun, réalitas anu ngawujud ngan hiji: Messi jeung rahayat Argéntina keur saruka bungah kusabab tropi piala dunia bisa dibawa deui ka nagarana.
Iwal ti kitu, kusabab kuring ngarojong Messi jeung Argentina, teu ngajadikeun diri kuring terus-terusan teuleum dina rasa kabungah. Nya biasa baé da ngaranna ogé sénsasi, jeung teu kudu dipaké alesan kusabab Argéntina jadi juara terus urang bisa sangeunahna nyebutan jeung ngékéak tim anu éléh. Wajar jeung lumrah dina kompetisi mah, silih éléhkeun.
Keur Messi sorangan, jadi juara piala dunia mangrupa préstasi puncak. Hiji jawaban tina pananya ti para supporter: Maradona mah bisa mawa Argéntina juara Piala Dunia 1986, Ari Messi iraha? Geus moal kacaritakeun deui dina mangsa kiwari jeung kahareup, jalma-jalma madungdengkeun deui lamun Messi can bisa mawa nagarana jadi juara piala dunia.
Ti taun 1986 nepi ka kiwari geus 36 taun lilana, hal ieu miboga harti, umur jalma anu kungsi ngalaman nyaksian Piala Dunia 1986 jeung 2022 ogé beuki ngolotan. Dunya terus ngalaman robah, tina leutik tuluy ngagedéan, tina budak tuluy jadi kolot. Pasualan piala dunia jeung maén bal lain hal anu kudu diadurényomkeun, tapi lenyepanen kumaha carana nagara batur dina ngokolakeun maén bal tug nepi ka bisa asup kana final piala dunia.
Waktu 36 taun karasa samporét malahan ampir teu karasa. Ti saprak kuring jeung barudak resep maén bal di kebon awi jeung sawah sabari maké kaos Maradona nepi ka kiwari geus sagala buluan. Sok sanajan karasa samporét tapi mangrupa lini masa anu panjang lamun dieusi ku hal positif jeung alus. Malahan kebon awi jeung sawah anu biasa dipaké tempat maén bal ogé, kiwari geus robah dipinuhan ku jlug jlegna wangunan.
Foto Maradona : AP/Reuters
Foto Messi : Getty Images
Posting Komentar untuk "Taun 1986: Kaos Maradona jeung Tas Pique"