Anomi

Hirup jaman kiwari, ceuk ahli sosial mah disebut anomi, leungitna niley, sakapeung sok disebut paradoks.

Jalma bakal kokotetengan nalika arek indit ka pagawean atawa kamana bae tinggaleun hp atawa tablet. Keun imah teu dikonci mah, anu penting indit ka panyabaan mawa power bank.

Awewe cumentil jeung jalingkak teh dina lima dekade ka tukang dianggap teu wejes, beda jeung jaman kiwari, garumeulis, carumentil, bari biwir dimunyan-manyun terus photo dipasang dina profile geus teu aneh. Malah disebutna, mibapa ka jaman.

Facebook, twitter, jeung medsos lianna dijajaga, malahan diproteksi ulah nepi ka aya jalma sambarangan bisa asup. Tapi, hate sorangan teu diprotek, malah androk nyingsat ka luhur mah teu jadi soal.

Tiap kanaekan harga BBM, ampir kabeh jalma ngarahuh bari jebi ka pamarentah, ngan anehna, jumah motor anu dikiriditkeun bisa nepi ka 1.000 unit tiap bulan. Jalan-jalan beuki rongkah macetna.

Harga HP, smart-phone, tablet, jeung laptop geus diibaratkeun jeung harga suuk da beuki marurah, sedengkeun harga suuk jeung sarupaning kacang mah estu beuki nerekel naek.

Barudak di lembur leuwih apal kana ngaran-ngaran artis ti Korea, tapi nalika ditanya saha ari Darso, Mang Koko, maranehna culang-cileung, aya eta oge anu apaleun, ngan lain ka Mang Koko tukang ngacapi tapi ka Mang Koko tukang palitur.

Barudak umur PAUD jeung TK oge geus arapaleun kana Blackberry, iPhone, Nokia, jrrd, bari teu apal kana tangkal nam-nam, randu, waru, dadap, sanitri, jrrd.

Kyai anu ngaji bari khusu sok pada naringgalkeun ku jamaah, beda jeung kyai anu ngaguar bab agama sabari lulucon, samping diputer-puter pinuh ku jamaah, malah ngahaja diondang, didatangkeun ka lembur.

Nagara ngawajibkeun diajar ka rahayat, tapi waragad sakola sorangan beuki mahal. Anu jadi kolot mah baringung ampir tiap usik: budak arek asup sakola bingung, budak arek kaluar sakola oge bingung. Da babayareun disiksik ti sisi ti gigir.

Jalan-jalan diwangun beuki aralus, susukan oge ditembok kalawan tohaga, tapi tiap hujan turun, cai hujan teu katadah, banjir wae. Sanajan pamarentah ngadeugkeun Dinas Kebersihan bari lengkep ku sarana jeung prasarana oge runtah mah mancawura ti mana-mendi.

Loba anu ngajak ngalakukeun kaalusan tapi masih migawe kasalahan. Nya salah sahiji contona mah kuring sorangan meureun.

KANG WARSA

Dikirim dari ponsel cerdas BlackBerry 10.