Dina kahirupan urang, aya tilu jinis tokoh masarakat. Kahiji, tokoh atawa inohong anu bener-bener inohong. Kadua aya anu ditokohkeun ku balad jeung anakbuahna. Katilu aya anu ngahaja nokoh-nokohkeun diri. Anu rada bahaya mah jigana jalma anu ngaku-ngaku tokoh atawa inohong dina sagala widang bari can masagi ku pangaweruh, nya siga kuring pisan eta mah.
Mahabuna budaya- ah da ceuk Maslow mah anu disebut predikat inohong- teh mangrupakeun hiji tarekah "aktualisasi diri", hal anu wajar nalika jalma hayang meunang pangakuan ti balarea lamun dirina teh disebut aya - eksis ceuk basa ayeuna mah- . Ku rupa-rupa cara diudagna, da ngaranna oge jelema. Aya ku cara mintonkeun budaya, pakean, kabiasaan, pikiran, jrrd. Kapangaruhan ku kaayaan, bisa kapaksa oge bisa dipapaksa ku naon anu aya. Umpamana, dina taun 80-an mah, kuring keur leutik sok mamake baju pangsi, karah disebutan ku anu jadi babaturan. Puguh da harita mah anu disebut pakean mantes teh kameja cele jeung calana panjang lawon famatex. Kari-kari, pamarentah Orde Baru bener-bener lantip dina nyiksikan budaya Sunda.
Sarua jeung tokoh atawa inohong anu nerap ka hiji jalma, baheula mah kacida hese jalma hayang meunang predikat tokoh atawa inohong. Jalma bener-bener disebut inohong lamun geus miboga jejer anu jelas dina kahirupan jeung kudu boga pangaweruh anu geus masagi. Lain budak nongtot leho anu karek apal alif terus disebut salaku tokoh atawa inohong widang itu widang ieu. Bralna inohong estu ngamalir, jeung anu disebut inohong teh bisa diitung ku ramo leungeun. Ngan dina mangsa harita oge lain euweuh jalma anu ngainohongkeun diri. Aya, biasana ku neundeun huruf. "R" di hareupeun ngaranna, Raden! Ari nalika dipaluruh mah teuing ti mana manehna boga titel Raden, nya sangkan batur serab meureun.
Sistem kanagaraan oge mawa pangaruh dina ngarobah karakter jeung watek masarakat. Dina keur lumangsung sentralisasi mah henteu pati mahabu teuing jalma anu disebut tokoh atawa inohong masarakat. Nalika mangsa asup kana desentralisasi anu dilarapkeun lain saukur dina kumaha nata ngokolakeun hiji wilayah oge jalma-jalma geus boga pikiran kumaha cara ngokolakeun diri sangkal tetep diaku lamun maranehna aya jeung boga jejer dina kahirupan, salah sahijina nyaeta ku ngaku jeung mintonkeun diri jadi inohong. Aya anu ngaitkeun diri lamun manehna deukeut jeung pamarentah, aya anu nyebut jeung ngaku lamun diri manehna salaku turunan Raja Sunda, oge aya anu mintonkeun diri ku hal-hal alus, nembongkeun pangabisa jeung hiji karya. Ari sabenerna mah kabeh oge seja mintonkeun pangabisa, ngan aya anu sifatna bohong, aya oge anu jujur.
Anu lelengkah halu keneh samodel kuring mah ngan saukur bisa nepi ka mintonkeun hal-hal basajan. Komo nalika sagala hal meunang pangrojong ku kamajuan teknologi jeung informasi. Bisa nyerat sanajan sakasampeurna bari teu puguh jeung tetekon surat-serat oge bisa langsung diposting jeung kabaca ku balarea. Aya oge jalma-jalma anu karek lelengkah halu keur mintonkeun diri kucara ngebrehkeun kaayaan fisik, naon anu biasa dilakukeun, saukur arek dahar di restoran oge apanan dina mangsa ayeuna mah bisa dipoto terus dishare kana medsos. Nepi ka ibadah-ibadah jeung prak-prakkan amal hade oge kudu bae katenjo ku anu lain, disebut henteu ikhlash mah lain meureun da niatna mah keur ngajak ka batur ku cara nyabit-nyabit kaalusan.
Euweuh anu salah, kabeh oge mangrupa pangabutuh dasar jalma, lamun dirina hayang ngaaktualisasikeun diri ka batur. Malahan teu saeutik, jalma anu hayang ngaaktualisasikeun dirina ku cara ngabolekerkeun naon anu sakuduna disumputsalindungkeun. Anu salah mah, jalma anu loba pura-puran dina hirup, lolondokan, puguh oge photo batur, derr dijieun photo profile manehna dina medsos; nembongkeun antara henteu pede jeung sikep imitatif dina hirup.
Kang Warsa
Dikirim dari ponsel cerdas BlackBerry 10 saya dengan jaringan 3 Indonesia.
Posting Komentar untuk "Inohong"