Surabi Haneut Aduh Akang, Mangga Cobian

SURABI HANEUT, ADUH AKANG, MANGGA COBIAN

Ku: Kang Warsa

Guru MTs Riyadlul Jannah – Anggota PGRI Kota Sukabumi

Saha anu teu apal kuéh surabi? Bentukna munu'u, kawas naon Cing? Bener kawas surabi. Dicoélkeun kana peueut atawa cai gula anu geus dicaipatian. Pédo, nyam nyam nyam!

Surabi mangrupa ngaran kadaharan, geus pasti. Asal-muasalna aya dina mitologi Hindu. Geus apal kana carita samuderamantana? Hiji dongéng anu nyaritakeun Wishnu ngubek sagara susu keur ngahasilkeun cai kaabadian anu disebut amerta.

Hasil adukan sagara susu kaluar rupaning mahluk, meureun mangrupa galéndona lamun dina cipati mah, kadieunakeun mah sebut baé keju. Ngan kusabab ieu mah mitologi, anu kaluar dina adonan susu téh mahluk jahat, racun anu disebut Halahala.

Halahala bisa diperuhkeun ku Syiwa disesep teleb nepi ka béakna. Anu kaluar tina adukan sagaramantana nyaéta mahluk-mahluk alus, salah sahijina nyaéta Surabhi, hiji sapi ajaib anu bisa nyumponan sagala kahayang.

Surabhi dibikeun ka para resi, susuna kudu diadon jadi mantéga keur susuguh dina tiap kariaan. Asupna kayakinan Hindu ka Nusantara geus méngkolkeun kecap Surabhi tina asalna sapi jadi kana salah sahiji sasajén anu disuguhkeun dina acara rék ritual atawa sérémonial.

Kadieunakeun mah, nya kecap Surabhi ditibankeun kana kuéh anu munu'u siga susu parawan. Jadi aya hubunganna jeung bentuk mangrupa proyéksi tina salah sahiji anggahota awak awéwé.

Surabi haneut aduh akang mangga cobian.

Balandongan, 31 Oktober 2016

Dikirim dari ponsel cerdas BlackBerry 10 saya dengan jaringan Indosat.